ព័ត៌មានជាតិ

ស្នងការរាជធានី ដាក់បញ្ជាដល់អធិការខណ្ឌ និងមេប៉ុស្តិ៍ ត្រូវពន្លឿនការធ្វើឯកសារសេសសល់ជូនពលរដ្ឋឱ្យបានលឿន

បានផុស

៤ years មុន

នៅ

ថ្ងៃចន្ទ ៧ មិថុនា ២០២១

ដោយ

ស្នងការនគរបាលរាជធានីភ្នំពេញ បានដាក់បទបញ្ជាដល់មន្ត្រីពាក់ព័ន្ធទាំងអស់ ត្រូវត្រួតពិនិត្យឡើងវិញ និងស្រាវជ្រាវចំពោះឯកសារនៅសេសសល់ ដែលត្រូវដោះស្រាយជូនប្រជាពលរដ្ឋ ឱ្យបានលឿន ខណៈកន្លងមក សមត្ថកិច្ចជាប់រវល់លើការងារបិទខ្ទប់ ការងារអនុវត្តបម្រាមគោចរ និងការងារប្រចាំការតាមតំបន់ក្រហម លឿងទុំ និងតំបន់លឿង។

លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានណែនាំដល់អធិការខណ្ឌទាំង១៤ និងមេប៉ុស្តិ៍រដ្ឋបាលទាំង១០៥ ចំណុះស្នងការដ្ឋាននគរបាលរាជធានីភ្នំពេញ ត្រូវតែត្រួតពិនិត្យឡើងវិញ និងស្រាវជ្រាវមើលថា តើមានឯកសារអ្វីខ្លះដែលនៅសេសសល់ និងត្រូវធ្វើជូនប្រជាពលរដ្ឋ ដោយបន្តធ្វើកិច្ចការនេះឡើងវិញឲ្យបានឆាប់រហ័សបំផុត ដើម្បីពង្រឹងប្រសិទ្ធភាពការងារ និងបង្កើនទំនុកចិត្តពីប្រពលរដ្ឋមូលដ្ឋានមកលើសមត្ថកិច្ច។

លោកស្នងការក្រុងបានបន្តថា «សូមណែនាំបន្ថែមដល់ក្រុមការងារព័ត៌មាន និងប្រតិកម្មរហ័ស ទាក់ទងទៅលោកអធិការនគរបាលខណ្ឌទាំង១៤ និងលោកនាយប៉ុស្តិ៍នគរបាលរដ្ឋបាលទាំង១០៥ ចំណុះស្នងការដ្ឋាននគរបាលរាជធានីភ្នំពេញ ត្រូវតែត្រួតពិនិត្យឡើងវិញ និងស្រាវជ្រាវមើលថា តើមានឯកសារអ្វីខ្លះដែលនៅសេសសល់ និងត្រូវធ្វើជូនប្រជាពលរដ្ឋ ដោយបន្តធ្វើកិច្ចការនេះឡើងវិញឲ្យបានឆាប់រហ័សបំផុត បន្ទាប់ពីមួយរយ:ពេលកន្លងមកនេះកម្លាំងស្ទើរតែទាំងអស់ជាប់រវល់លើការងារបិទខ្ទប់ការងារអនុវត្តបម្រាមគោចរ និងការងារប្រចាំការតាមតំបន់ក្រហម លឿងទុំ និងតំបន់លឿង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្នងការបានបន្តទៀតថា ការជាប់រវល់លើការងារបិទខ្ទប់ ការងារអនុវត្តបម្រាមគោចរ និងការងារប្រចាំការតាមតំបន់ក្រហម លឿងទុំ និងតំបន់លឿងនេះ ដែលជាហេតុធ្វើឲ្យឯកសារ ដែលបងប្អូនប្រជាពលរដ្ឋមួយចំនួនត្រូវបានពន្យាពេលក្នុងការដោះស្រាយ។

ថ្មីៗនេះ លោកស្នងការនគរបាលរាជធានីភ្នំពេញ ក៏បានណែនាំដល់មន្ត្រីមួយចំនួនតូច ដែលអនុវត្តមិនទាន់បានល្អជូនប្រជាពលរដ្ឋពិសេសលើការងារធ្វើសៀវភៅស្នាក់នៅ និងសៀវភៅគ្រួសារ ត្រូវតែកែប្រែទម្លាប់នេះមកបម្រើប្រជាពលរដ្ឋឲ្យបានល្អ និងទទួលបាននូវភាពទុកចិត្ត និងជឿជាក់ពីសំណាក់ប្រជាពលរដ្ឋ។

ជាមួយគ្នានោះ ក្នុងករណីអធិការខណ្ឌ និងមេប៉ុស្តិ៍ ណាមានការយឺតយ៉ាវក្នុងការដោះស្រាយឯកសារជូនបងប្អូនប្រជាពលរដ្ឋ សូមប្រជាពលរដ្ឋមេត្តាផ្ដល់ព័ត៌មានទៅកាន់លេខ ០៦៩ ៥១៦៩៩៩ ដើម្បីឱ្យក្រុមការងារដោះស្រាយជូនឱ្យបានទាន់ពេលវេលា៕

អត្ថបទ ៖ សំអឿន

Related Topics:ស្នងការដ្ឋាននគរបាលរាជធានីភ្នំពេញ