ដុត​កម្ទេច​សាច់មាន់​ខូចគុណភាព​ជាង ៥ តោន​ដែល​លប​ឆ្លងដែន​ពី​ប្រទេស​ថៃ​​

​សាច់មាន់ ឆ្អឹង​មាន់ គ្រឿងក្នុង និង​ប្រហិត ដែល​ខូចគុណភាព ត្រូវ​បាន​រៀបចំ​ពិធី​ដុត​កម្ទេចចោល បន្ទាប់ពី​ត្រូវ​បាន​កម្លាំង​ជំនាញ​បង្ក្រាប ​នៅ​ក្បែ​រមាត់ច្រក​អន្តរជាតិ​ដូង ក្នុងស្រុក​កំរៀង។​

​ការឃាត់​នេះ​ គឺ​បាន​ប្រព្រឹត្ត​ឡើង​កាលពី​ល្ងាច​ថ្ងៃ​ទី​៦ ខែ​មិថុនា ឆ្នាំ​២០២១ ក្នុងភូមិ​សាស្ត្រ​ស្រុក​កំ​រៀរ ខេត្តបាត់ដំបង ដែល​កម្លាំង​បង្ក្រាប​នោះ​មាន​ប៉ូលិស​សេដ្ឋកិច្ច ប៉ូលិស​ច្រកព្រំដែន កម្លាំង​នាយកដ្ឋាន​ការពារ​អ្នកប្រើប្រាស់​កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ​( ក​.​ប​.​ប ) ដឹកនាំ​ដោយ​លោក ហាក់ សិខរិន និង កម្លាំង​ការិយាល័យ​ស្រាវជ្រាវ និង​បង្ក្រាប​អំពើ​រត់ពន្ធ ប្រចាំ​តំបន់​៤ ដឹកនាំ​ដោយ​លោក សាយ ហឿន។​

​កិច្ចប្រតិបត្តិការ​នេះ​គឺ​ឃាត់​បាន​រថយន្ត​ម៉ាក​សាំង​យ៉ុង ១ គ្រឿង ដែលមាន​ដឹក​សាច់មាន់​ខូចគុណភាព​ចម្រុះ​សរុប​ទម្ងន់ ៥០៣៦ គីឡូក្រាម និង​អ្នកបើកបរ​ម្នាក់​។ នៅវេលា​ម៉ោង​២​រសៀល ថ្ងៃទី​៧ ខែ​មិថុនា នេះដែរ កម្លាំងចម្រុះ​ក៏បាន​រៀបចំ​ពិធី​ដុត​កម្ទេច​នៅ​ទីលាន​ចាក់សំរាម ក្នុងភូមិ​សាស្ត្រ​ស្រុក​ឯក​ភ្នំ ដើម្បី​ទប់ស្កាត់​នូវ​ការប៉ះពាល់​ដល់​សុខភាព​របស់​ប្រជាពលរដ្ឋ ក្រោម​ការដឹកនាំ​ផ្ទាល់​របស់លោក ផេង សិទ្ធី អភិបាលក្រុង​បាត់ដំបង​៕

អត្ថបទ៖ សោ និយម​រ័ត្ន​

សូមចុចអាន៖ ឃាត់ខ្លួននារីវ័យក្មេងពីរនាក់កំពុងឈរចែកចាយថ្នាំញៀន​