អ្នក​ដំណើរ​ចេញចូលខេត្តសៀមរាប ត្រូវ​ប្រើកម្មវិធីចុះ​​ឈ្មោះថ្មី ងាយស្វែងរក​​អ្នកពាក់ព័ន្ធ​​កូវីដបាន​រហ័ស

អាជ្ញាធរ​ខេត្ត​សៀមរាប​កាលពី​ម្សិលមិញនេះ ​បាន​រៀបចំ​កិច្ចប្រជុំណែនាំដាក់ឱ្យអនុវត្ត​កម្មវិធី​​ជំនាន់​ទីពីរ តាមប្រព័ន្ធចុះឈ្មោះអ្នកដំណើរចូលក្នុងភូមិសាស្ត្រខេត្តសៀមរាប ដើម្បីងាយស្រួលក្នុងស្រាវជ្រាវអ្នកពាក់ព័ន្ធ និង​អ្នកវិជ្ជមានជំងឺកូវីដ-១៩ បានទាន់ពេលវេលា។

ក្រោយការពិភាក្សាលើប្រព័ន្ធចុះឈ្មោះជំនាន់ថ្មីនេះ ឯកឧត្តម ទៀ សីហា អភិបាលខេត្តសៀមរាប​បានគូសបញ្ជាក់ថា ប្រព័ន្ធថ្មីនេះ នឹងជួយកាត់បន្ថយការកកស្ទះនៅចំណុចព្រំប្រទល់ ដោយអ្នកដំណើរដែលធ្វើដំណើរចូលភូមិសាស្ត្រខេត្តសៀមរាប អាចចុះឈ្មោះដោយខ្លួនឯងបាន តាមរយៈប្រព័ន្ធចុះឈ្មោះជំនាន់ទី២នេះ។

កន្លងមកប្រព័ន្ធចុះឈ្មោះជំនាន់ទី១ គឺអ្នកដំណើរទាំងអស់ត្រូវចុះមកផ្តល់ព័ត៌មានដល់ក្រុមការងារ ហើយក្រុមការងារវាយបញ្ជូន។ ​ដោយឡែក​ប្រព័ន្ធចុះឈ្មោះ ( Web App )ជំនាន់ទី២ ងាយស្រួល​ដល់​អាជ្ញាធរ​​​ស្រាវជ្រាវក្នុងការកំណត់មុខសញ្ញាអ្នកពាក់ព័ន្ធដោយផ្ទាល់ និងដោយប្រយោល ដែលជាអ្នករួមដំណើរក្នុងរថយន្តតែមួយ ពិសេសក្នុងរថយន្តឈ្នួល និងរថយន្តក្រុង តាមរយ:នៃការស្កែន QR Code ដែលនឹងត្រូវយកទៅប្រើប្រាស់គ្រប់គ្រងទិន្នន័យនៅតាមបណ្តាច្រកព្រំប្រទល់ទាំងបី។

ប្រព័ន្ធគ្រប់គ្រងអ្នកដំណើរចូលក្នុងភូមិសាស្ត្រខេត្តសៀមរាប​ថ្មី នឹង​រួមចំណែកយ៉ាងសំខាន់ដល់ក្រុមការងារស្រាវជ្រាវ ក្នុងការកំណត់មុខសញ្ញាអ្នកពាក់ព័ន្ធដោយផ្ទាល់ និងដោយប្រយោល។

ខេត្ត​សៀមរាប​ប៉ុន្មានថ្ងៃនេះមានការ​ផ្ទុះឆ្លង​នៅស្រុកសូទ្រនិគម និងស្រុកជីក្រែង ដែលជាករណីគួរ​ឲ្យ​ព្រួយបារម្ភបំផុត។

ឯកឧត្តម អភិបាលខេត្តសៀមរាប បានដាក់ចេញនូវផែនការឲ្យក្រុមការងារបន្តស្រាវជ្រាវរកអ្នកពាក់ព័ន្ធ ពង្រឹងការធ្វើចត្តាឡីស័កតាមផ្ទះ ព្រមទាំងអំពាវនាវផងដែរ សូមឲ្យប្រជាពលរដ្ឋដែលរស់នៅ ឬពាក់ព័ន្ធ ឬឆ្លងកាត់តំបន់នោះ មានការប្រុងប្រយ័ត្នខ្ពស់ និងអនុវត្តតាមវិធានការសុខាភិបាល និងវិធានការនានាដែលរដ្ឋបាលខេត្តបានដាក់ចេញ៕