និមិត្តរូបកែវផ្ទុកដំណក់ប្រេងដំបូងរបស់កម្ពុជាត្រូវបានប្រសិទ្ធនាមថា «បឋមតេលពិន្ទុកម្ពុជា»

យោងតាមសុន្ទរកថារបស់ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការសាងសង់វិមានឈ្នះ ឈ្នះ កាលពីថ្ងៃទី៩ មិថុនា ២០២១ ក្នុងពិធីប្រគល់-ទទួលកែវផ្ទុកដំណក់ប្រេងលើកដំបូងរបស់កម្ពុជា បានប្រសិទ្ធនាមនិមិត្តរូបកែវដំណក់ប្រេងនេះថា «បឋមតេលពិន្ទុកម្ពុជា» ដែលនឹងយកទៅរៀបចំទុកជាវត្ថុតឹកតាងប្រវត្តិសាស្ត្រ ក្នុងសារមន្ទីរមគ្គុទេសក៍តេជោសែន វិមានឈ្នះ ឈ្នះ។  

បឋមតេលពិន្ទុកម្ពុជា (ភាសាបាលី) មកពីពាក្យ បឋម ប្រែថាដំបូង + តេល ប្រែថាប្រេង + ពិន្ទុ ប្រែថាដំណក់ កម្ពុជា គឺប្រទេសកម្ពុជា។ ប្រែជារួមថា “ដំណក់ប្រេងដំបូងរបស់កម្ពុជា”។ កែវផ្ទុកដំណក់ប្រេងដំបូងបំផុតរបស់កម្ពុជានេះ ត្រូវបានក្រុមអ្នកជំនាញ រចនាបថបែបខ្មែរទំនើប មានភាពស្រស់បំព្រង រស់រវើក និងបង្កប់ទៅដោយអត្ថន័យទៅតាមក្បាច់ចម្លាក់នីមួយៗថែមទៀតផង៕