ព័ត៌មានជាតិ

កាច់សោ ក ម៉ូតូគេបានហើយ ឆ្លៀតឡើងទៅយកកាបូបខោអាវ ចុះមកវិញម្ចាស់ចាប់ជាប់

បានផុស

៣ years មុន

នៅ

ថ្ងៃពុធ ៩ មិថុនា ២០២១

ដោយ

ជនសង្ស័យម្នាក់ត្រូវបានសមត្ថកិច្ចឃាត់ខ្លួនយកទៅសួរនាំ ក្រោយពីធ្វើសកម្មភាពកាច់សោ ក ម៉ូតូអ្នកជួលបន្ទប់ជិតគ្នា បានសម្រេច ហើយរត់ឡើងទៅយកការបូបខោអាវនៅជាន់ទី២ ចុះមកវិញបម្រុងជិះចេញត្រូវម្ចាស់មកទាន់ចាប់ប្រគល់ឱ្យសមត្ថកិច្ច កាលពីវេលាម៉ោង១២និង៣០នាទីរសៀលថ្ងៃទី៩ ខែមិថុនា ឆ្នាំ២០២១ នៅភូមិព្រៃព្រីងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។

ជនសង្ស័យឈ្មោះ ចែម នាង ភេទប្រុស អាយុ៤០ឆ្នាំ មុខរបរមិនពិតប្រាកដ ស្នាក់បន្ទប់ជួលកន្លែងកើតហេតុ មានស្រុកកំណើតនៅស្រុកសំរោង ខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសម្តីជនសង្ស័យបានសារភាពថា ដោយសារតែគ្មានលុយបង់ថ្លៃផ្ទះជួលទើបម្ចាស់ផ្ទះដេញលែងឱ្យស្នាក់នៅ ហើយគ្មានលុយជិះរថយន្តឈ្នួលទៅស្រុកកំណើត ទើបបែកគំនិតឃើញម៉ូតូអ្នកជួលបន្ទប់ជិតគ្នាម៉ាកnex ពណ៌ទឹកក្រូចលាយ ស ពាក់ស្លាកលេខភ្នំពេញ1HT 3367 ចតនៅមុខបន្ទប់ដោយម្ចាស់នៅខាងក្នុងបន្ទប់ ឃើញឱកាសល្អក៏យកដែកចុងស្រួចមកកាច់សោ ក បំបែកគ្រាប់តែម្តង។

ជនសង្ស័យបន្តថា ពេលធ្វើសកម្មភាពបានសម្រេចហើយ ខ្លួនក៏ឡើងទៅបន្ទប់ខ្លួនវិញដែលនៅជាន់ទី២ ដើម្បីយកការបូបខោអាវ។ លុះពេលចុះមកវិញគ្រាន់តែបោះជើងឡើងបញ្ឆេះម៉ូតូបម្រុងជិះចេញទៅស្រាប់តែម្ចាស់មកទាន់ចាប់ប្រគល់ជូនសមត្ថកិច្ចតែម្តង។

បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីចាត់ការតាមផ្លូវច្បាប់ ចំណែកម៉ូតូត្រូវបានប្រគល់ជូនម្ចាស់វិញ៕

អត្ថបទ ៖ សុខា