ខេត្តសៀមរាបសម្រេចដាក់ភូមិសាស្ត្រស្រុកចំនួនពីរ ជាតំបន់ក្រហម លឿងទុំ និងតំបន់លឿង

រដ្ឋបាលខេត្តសៀមរាប​បានសម្រេចដាក់ភូមិសាស្ត្រក្នុងស្រុកចំនួនពីរកំណត់ជាតំបន់ក្រហម តំបន់​លឿងទុំ និងតំបន់លឿង រយៈពេលពីរសប្ដាហ៍ ក្រោយផ្ទុះការឆ្លងរីករាលដាលនៃជំងឺកូវីដ-១៩ កាន់តែធ្ងន់ធ្ងរ។

ក្នុងសេចក្ដីជូនដំណឹងដែលចេញនៅថ្ងៃទី០៩ ខែមិថុនា ឆ្នាំ២០២១ បានបញ្ជាក់ថា ត្រូវបិទខ្ទប់​ភូមិ​​សាស្ត្រដែលមានការឆ្លងរីករាលដាលនៃជំងឺកូវីដ-១៩ ជាបណ្ដោះអាសន្នរយៈពេលពីរសប្ដាហ៍ គិត​ចាប់​បីថ្ងៃទី០៩ ខែមិថុនា ឆ្នាំ២០២១ រហូតដល់ថ្ងៃទី២២ ខែមិថុនា ឆ្នាំ២០២១ ដើម្បីទប់ស្កាត់ការឆ្លង​រីករាល​ដាលនៃជំងឺកូវីដ-១៩ ក្នុងភូមិសាស្ត្រស្រុកសូទ្រនិគម និងស្រុកជីក្រែង ដោយកំណត់ជាតំបន់​ក្រហម តំបន់លឿងទុំ និងតំបន់លឿង។

រដ្ឋបាលខេត្ត បានកំណត់យកភូមិសាស្ត្រឃុំកំពង់ឃ្លាំង ស្រុកសូទ្រនិគម ជាតំបន់ក្រហម ឃុំ​គោកធ្លក​ក្រោម ស្រុកជីក្រែង ជាតំបន់លឿងទុំ និងឃុំកំពង់ក្ដី ស្រុកជីក្រែង ជាតំបន់លឿង។

សូមបញ្ជាក់ថា គិតត្រឹមថ្ងៃទី០៩ ខែមិថុនា ឆ្នាំ២០២១ នេះ ខេត្តសៀមរាប មាកអ្នកឆ្លងជំងឺកូវដ-១៩ សរុបចំនួន២៩៩នាក់ ព្យាបាលជាសះស្បើយ១០៣ កំពុងសម្រាកព្យាបាល១៩៤នាក់ និងស្លាប់២​នាក់៕

អត្ថបទ ៖ សុខុម