ព័ត៌មានជាតិ

រយៈពេល៥ខែឆ្នាំនេះ មានមនុស្សស្លាប់និងរបួសជិត១០០នាក់ ដោយសារ រន្ទះបាញ់

បានផុស

៤ years មុន

នៅ

ថ្ងៃព្រហស្បតិ៍ ១០ មិថុនា ២០២១

ដោយ

យោងតាមរបាយការណ៍របស់គណៈកម្មការជាតិគ្រប់គ្រងគ្រោះមហន្តរាយ បានឱ្យដឹងថា ចាប់ពីខែមករា រហូតមកដល់ខែឧសភា ឆ្នាំ២០២១នេះ បាតុភូតរន្ទះបាញ់បានកើតឡើងចំនួន៥៧លើកបណ្តាលឱ្យខូចខាតផ្ទះសម្បែងចំនួន៤ខ្នង ស្លាប់មនុស្សចំនួន៤៥នាក់ រងរបួស៣០នាក់ និងងាប់គោក្របីចំនួន២៨ក្បាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ដដែលបានបន្តថា តួលេខនេះ បើធៀបទៅនឹងរយៈពេល៥ខែដូចគ្នាឆ្នាំ២០២០កន្លងទៅឃើញថា មានការកើនឡើងខណៈ៥ខែឆ្នាំមុនមានបាតុភូតរន្ទះបាញ់បានកើតឡើងចំនួន៣៣លើក បណ្តាលឱ្យខូចខាតផ្ទះសម្បែងចំនួន៨ខ្នង ស្លាប់មនុស្សចំនួន១៥នាក់ រងរបួសចំនួន១១នាក់និងងាប់គោ-ក្របីចំនួន២១ក្បាល។

យ៉ាងណាក៏ដោយ គណៈកម្មការជាតិ គ្រប់គ្រងគ្រោះមហន្តរាយ បានអំពាវនាវដល់ប្រជាពលរដ្ឋត្រូវបង្កើនការប្រុងប្រយ័ត្នខ្ពស់ ចំពោះបាតុភូតផ្គររន្ទះទាំងអស់គ្នានៅក្នុងរដូវភ្លៀងនេះ ដើម្បីកាត់បន្ថយការរងគ្រោះនិងការស្លាប់ដោយសារបាតុភូតធម្មជាតិនេះ។

ចំណែកក្រសួងសុខាភិបាលតែងតែធ្វើការណែនាំដល់ប្រជាពលរដ្ឋ នូវវិធីមួយចំនួនដើម្បីការពារខ្លួនពីបាតុភូតរន្ទះបាញ់នេះ ដូចជានៅពេលមានផ្លេកបន្ទោរ ឬផ្គររន្ទះ ត្រូវបន្ទន់ខ្លួនដោយបញ្ឈរជង្គង់ទាំងពីរជិតគ្នា និងយកដៃខ្ទប់ត្រចៀក ត្រូវរត់ចេញពីទឹក ឬស្រែនៅខាងក្នុង ឬរត់ចូលផ្ទះជាប្រញាប់ត្រូវដកឌុយដោតភ្លើង ឬឌុយទូរសព្ទ័ដោយទុកចម្ងាយ១ម៉ែត្រពីប្រភពចរន្តអគ្គិសនី និងត្រូវបន្ទន់ខ្លួនអោបក្បាលជង្គង់ និងបិទត្រចៀកទាំងសងខាងនៅក្រោមបង្គោលភ្លើង ។

ជាមួយគ្នានេះដែរ មិនត្រូវនិយាយទូរស័ព្ទនៅពេលឮសំលេងផ្គរ មិនត្រូវជិះម៉ូតូឬកង់នៅពេលមេឃភ្លៀង ឬអង្គុយក្នុងតង់និងអង្គុយនៅក្រោមដើមឈើឡើយ ត្រូវអង្គុយបន្ទន់ខ្លួនដោយរក្សាចម្ងាយ៤ម៉ែត្រពីមែកឈើ។

ចំពោះ វិធីសង្គ្រោះបឋមនៅពេលមានគ្រោះរន្ទះវិញ ក្រសួងបានណែនាំឲ្យប្រជពលរដ្ឋត្រូវផ្លុំខ្យល់ចូលមាត់និងមាត់ជាមួយជនរងគ្រោះ ក្នុងករណីជនរងគ្រោះមិនដកដង្ហើមនិងសង្កាត់ដៃទាំងពីរលើសន្ទះទ្រូងក្នុងករណីជនរងគ្រោះគ្មានជីវចរ ត្រូវក្រាលកន្ទេលឬបាវឆ្នួតកុំឲ្យជនរងគ្រោះនៅផ្ទាល់ដីឬទឹកជ្រាំការពារដើម្បីកុំឲ្យជនរងគ្រោះរងភាពត្រជាក់ខ្លួនពេក និងចល័តជនរងគ្រោះដោយប្រុងប្រយ័ត្នក្នុងករណីជនរងគ្រោះមានបាក់ឆ្អឹងឬហូរឈាម៕

អត្ថបទ ៖ សំអឿន