ព័ត៌មានជាតិ

អាជ្ញាធរខណ្ឌឫស្សីកែវ ស្ថាបនាផ្លូវប្រវែង៥០០ម៉ែត្ររួចរាល់ហើយ ក្រោយខូចខាតជាច្រើនឆ្នាំនោះ

បានផុស

៣ years មុន

នៅ

ថ្ងៃពុធ ១៦ មិថុនា ២០២១

ដោយ

កំណាត់ផ្លូវមួយខ្សែ នៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ នៅចំណុចខាងលិច វត្តទួលសន្តិវ័ន ឈាងខាងជើង ដែលរងការខូចខាតខ្លាំងប្រវែងប្រហែល៥០០ម៉ែត្រ មកដល់បច្ចុប្បន្ននេះ ត្រូវបានអាជ្ញាធរខណ្ឌឬស្សីកែវ ស្ថាបនាជួសជុលរួចរាល់ហើយ ក្រោយពីទទួលបានការស្នើសុំពីបងប្អូនប្រជាពលរដ្ឋរស់នៅក្នុងមូលដ្ឋាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមជម្រាបជូនថា កាលពីកន្លងទៅប្រជាពលរដ្ឋរស់នៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាប់ឆ្នាំមកហើយ ពីមុនផ្លូវមិនសូវខូចខាតខ្លាំងនោះទេ ទើបតែរយះពេលចុងក្រោយនេះ ផ្លូវចេះតែខូចខ្លាំងទៅៗ នាខែប្រាំងក៏លំបាក ខែវស្សាភ្លៀងធ្លាក់បែកភក់វ៉ល់ ធ្វើដំណើរទៅណាមកណាមិនចង់កើតនោះទេ ។

ប្រភពព័ត៌មានប្រាប់បន្តឲ្យដឹងថា ផ្លូវដែលខូចខាតខ្លាំងនេះ គឺប្រវែងប្រហែល៥០០ម៉ែត្រ បង្កឡើងដោយសារតែក្រុមរថយន្តធុនធំ ជាពិសេសក្រុមរថយន្តដឹកខ្សាច់តែម្តងជាអ្នកបំផ្លាញ ។

ដោយជួបការលំបាក ក្នុងការធ្វើដំណើរ ប្រជាពលរដ្ឋទូទៅ ក៏ដូចជាពួកគាត់សូមស្នើទៅដល់អាជ្ញាធរខណ្ឌឫស្សីកែវ មេត្តាជួយសម្រួលក្នុងការស្ថាបនាឲ្យបានល្អ សម្រាប់បម្រើផលប្រយោជន៍ ជូនដល់ប្រជាពលរដ្ឋរស់នៅក្នុងភូមិ ក៏ដូចជា អ្នកដំណើរទូទៅផង ។

ទោះបីយ៉ាងណាក្តី អាជ្ញាធរខណ្ឌឬស្សីកែវ សូមសំណូមពរទៅដល់បងប្អូនប្រជាពលរដ្ឋទាំងអស់ដែលរស់នៅតាមបណ្តោយផ្លូវបេតុងមួយខ្សែនេះ សូមជួយថែរក្សាផ្លូវឲ្យបានល្អប្រសើរប្រើប្រាស់បានយូអង្វែង និងត្រូវរៀបចំទុកដាក់សំរាមឲ្យបានត្រឹមត្រូវ ជៀសវាងបោះចោលពាសវាលពាសកាល ជាពិសេសកុំចោះសំរាមនៅលើគំរបលូ ឬ ក្នុងលូ ដែលអាចនាំឲ្យស្ទះប្រព័ន្ធលូបង្ហូររទឹកផងដែរ ៕

អត្ថបទ ៖ រ៉ាវុទ្ធ