ព័ត៌មានជាតិ

នាំយកអំណោយសម្ដេចតេជោ ប្រគេនព្រះសង្ឃ និងចែកជូនតាជី យាយជី និងជាពលរដ្ឋ ដែលកំពុងធ្វើចត្តាឡីស័ក នៅក្នុងវត្តស្ទឹងមានជ័យ

បានផុស

៤ years មុន

នៅ

ថ្ងៃសុក្រ ១៨ មិថុនា ២០២១

ដោយ

រដ្ឋបាលរាជធានីភ្នំពេញ បានយកនូវទេយ្យទាន ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ទៅប្រគេនព្រះសង្ឃ និងចែកជូនតាជី យាយជី បញ្ញវន្ត ក្មេងវត្ត ប្រជាពលរដ្ឋ ចំនួន៣៣៤ អង្គ/ នាក់ ដែលកំពង់ធ្វើចត្តាឡីស័ក នៅវត្តចង្ក្រានតាព្រហ្ម ហៅវត្តស្ទឹងមានជ័យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវេលាព្រឹក ថ្ងៃសុក្រ ៩កើត ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនិងថ្ងៃទី១៨ ខែមិថុនា ឆ្នាំ២០២១នេះ លោក នួន ផារ័ត្ន អភិបាលរង រាជធានីភ្នំពេញ អមដំណើរដោយ លោក ឌី រ័ត្នខេមរុណ អភិបាលរងខណ្ឌមានជ័យ បានចុះសំណេះសំណាល សួរសុខទុក្ខ និងនាំយកទេយ្យទាន មកប្រគេនព្រះសង្ឃ និងចែកជូនប្រជាពលរដ្ឋចំនួន៣៣៤ អង្គ/នាក់ ដែលជាអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រគេនជូនព្រះសង្ឃ និងចែកជូនតាជី យាយជី បញ្ញវន្ត ក្មេងវត្ត ប្រជាពលរដ្ឋ ដែលកំពុងធ្វើចត្តាឡីស័ក នៅវត្តចង្ក្រានតាព្រហ្មស្ទឹងមានជ័យ ។

លោក នួន ផារ័ត្ន អភិបាលរងរាជធានីភ្នំពេញ បានពាំនូវការផ្តាំផ្ញើរសាកសួរសុខទុក្ខពីសណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជានិច្ចកាលសម្តេចទាំងទ្វេ តែងតែយកចិត្តទុកដាក់ គិតគូរពីសុខទុក្ខ បងប្អូនប្រជាពលរដ្ឋ តាជី យាយជី បញ្ញវន្ត ក្មេងវត្ត ក៏ដូចជា ព្រះសង្ឃ តាមទីវត្តអារាមនានា ក្នុងព្រះរាជាណាចក្រកម្ពុជា ។ សម្ដេចទាំងទ្វេបានយកចិត្តទុកដាក់ណាស់ ចំពោះបងប្អូនប្រជាពលរដ្ឋកម្ពុជាទាំងមូល ជាពិសេសតាជី យាយជី បញ្ញវន្ត ក្មេងវត្ត និងព្រះសង្ឃ ដែលកំពង់ធ្វើចត្តាឡីស័ក ។

លោកអភិបាលរងរាជធានីភ្នំពេញ បានជូនពរចំពោះព្រះសង្ឃ បញ្ញវន្ត ក្មេងវត្ត តាជី យាយជី ប្រជាពលរដ្ឋ ដែលធ្វើតេស្តកាលពីម្សិលមិញ ដែលទទួលលទ្ធផលវិជ្ជមានមេរោគកូវីដ-១៩ ឲ្យបានឆាប់ជាសះស្បើយ ។ ក្នុងការធ្វើតេស្តនោះសរុបចំនួន៣៧៣ អង្គ/នាក់ វិជ្ជមានសរុប៣៩អង្គ/នាក់ ។

ជាមួយគ្នានេះ លោកអភិបាលរង ក៏បានអំពាវនាវដល់បងប្អូនប្រជាពលរដ្ឋ តាជី យាយជី បញ្ញវន្ត ក្មេងវត្ត និងព្រះសង្ឃ ដែលកំពុងធ្វើចត្តាឡីស័ក សូមបន្តអនុវត្តនូវវិធានការក្រសួងសុខាភិបាល និងអនុវត្តនូវវិធាការ ៣ការពារ និង ៣កុំ របស់រាជរដ្ឋាភិបាល ឲ្យបានខ្ជាប់ខ្ជួន ។

សូមជម្រាបជូនថា ទេយ្យទានដែលប្រគេព្រះសង្ឃ និងចែកជូនតាជី យាយជី បញ្ញវន្ត ក្មេងវត្ត ប្រជាពលរដ្ឋ រួមមាន ៖ អង្ករ២តោនមី៣០កេសតូច ទឹកត្រី១០យួរ ទឹកស៊ីអ៊ីវ១០យួរ ទឹកសុទ្ធ៣០កេស ត្រីខ៥កេស ៕

អត្ថបទ ៖ រ៉ាវុទ្ធ