វ៉ាក់សាំង​ចំនួន​១លានដូសបន្ថែមទៀត បានមកដល់កម្ពុជានៅព្រឹកនេះ

វ៉ាក់សាំងបង្ការជំងឺកូវីដ១៩ ប្រភេទស៊ីណូវ៉ាក់ (Sinovac) ចំនួន១​លានដូសបន្ថែម​ទៀត ដែលកម្ពុជាបញ្ជាទិញពីប្រទេសចិន ​​បានដឹក​មកដល់ប្រទេសកម្ពុជាហើយ នៅវេលាម៉ោងប្រមាណ១០ព្រឹក ថ្ងៃសៅរ៍ ទី១៩ ខែមិថុនា ឆ្នាំ២០២១នេះ​ ហើយលោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បាន​អញ្ជើញទទួលវ៉ាក់សាំង​នេះ នៅឯព្រលានយន្តហោះអន្តរជាតិភ្នំពេញ​។​

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ធ្លាប់បានបញ្ជាក់ថា រាជរដ្ឋាភិបាលកម្ពុជាបានដាក់ចេញយុទ្ធសាស្ត្រចាក់វ៉ាក់សាំងនេះឱ្យបានលឿន តាមដែលអាចធ្វើទៅបានជូនដល់ប្រជាពលរដ្ឋ។ ទន្ទឹមនឹងនេះរាជរដ្ឋាភិបាល នឹង​​ស្វះស្វែងរកវ៉ាក់សាំង​ ដើម្បី​ចាក់ជូនប្រជាពលរដ្ឋ។

តាមគម្រោង រាជរដ្ឋាភិបាលកម្ពុជា បានដាក់ចេញផែនការចាក់វ៉ាក់សាំងជូនប្រជាពលរដ្ឋអាយុចាប់ពី១៨ឆ្នាំឡើង ប្រមាណ១៣លាននាក់ ត្រូវនឹងវ៉ាក់សាំងប្រមាណ២៦លានដូស។ នៅក្នុងខែមិថុនា នេះ វ៉ាក់សាំង​បានដឹកមកដល់ប្រទេសកម្ពុជាជាបន្តបន្ទាប់ ដែលជាការជួយឱ្យកម្ពុជាមានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋ។ កម្ពុជានឹងសម្រេចការចាក់វ៉ាក់សាំងជូនប្រជាពលរដ្ឋចំនួន១០លាននាក់ នៅក្នុងឆ្នាំ២០២១នេះ ឬយ៉ាងយូរបំផុតនៅដើមឆ្នាំ២០២២។

​លោកស្រី យក់ សម្បត្តិ ​បានគូសបញ្ជាក់ថា រាជរដ្ឋាភិបាលកម្ពុជា​បានដាក់ចេញផែនការចាក់វ៉ាក់សាំងជូនប្រជាពលរដ្ឋអាយុចាប់ពី​១៨ឆ្នាំឡើង ប្រមាណ១៣លាននាក់ ត្រូវនឹងវ៉ាក់សាំងប្រមាណ​២៦លានដូស។ បើតាមលោកស្រី យក់ សម្បត្តិ វ៉ាក់សាំងទាំងនេះ កម្ពុជាបានចាត់​ចែង និងបញ្ជាទិញរួចរាល់ផងដែរ៕

 កោះកែវ