ពលរដ្ឋ ៤ នាក់ទៀតស្លាប់នៅខេត្តព្រៃវែង សង្ស័យពុលស្រា

មនុស្សចំនួន ៤ នាក់ នៅស្រុកពារាំង ខេត្តព្រៃវែង បានស្លាប់ជាបន្តបន្ទាប់ក្នុងថ្ងៃតែមួយ បន្ទាប់​ពីគេ​ដាក់​ការ​សង្ស័យ​ទៅ​លើ​ករណី​ពុល​ស្រា​ស និង​ស្រា​ថ្នាំ។

អភិបាលស្រុកពារាំង លោក ហ៊ី ធួក បាន​ឱ្យ​ដឹង​នៅ​ថ្ងៃ​ទី ២០ ខែ​មិថុនា​ថា​ករណី​សង្ស័យ​ពុល​ស្រា​ស​ស្រា​ថ្នាំ បណ្ដាល​ឱ្យស្លាប់​បាត់បង់ជីវិតរហូតដល់៤នាក់នេះ បាន​កើត​ឡើង​នៅក្នុងភូមិយោត ឃុំមេសរប្រចណ្ឌ័ ស្រុកពារាំង ខេត្តព្រៃវែង កាលពីថ្ងៃទី១៩មិថុនា ដោយជនរងគ្រោះទី១ឈ្មោះ ឆួន ពៅ ភេទប្រុស អាយុ៥៣ឆ្នាំ ទី២ឈ្មោះ សឺន ផន ភេទប្រុស អាយុ៣១ឆ្នាំ ទី៣ឈ្មោះ ចយ ភេទប្រុស អាយុ៤៥ឆ្នាំ និងទី៤ឈ្មោះ ហ៊ាន ណេន ភេទប្រុស អាយុ៤៧ឆ្នាំ។

លោក ហ៊ី ធួក បានបន្តទៀតថា ក្នុងចំណោមជនរងគ្រោះទាំងអស់ គឺមានជនរងគ្រោះម្នាក់​បាន​ស្លាប់​ពេលក្រុមគ្រួសារបញ្ជូនមកដល់មន្ទីរពេទ្យ ចំណែកជនរងគ្រោះ៣នាក់ផ្សេងទៀត គឺបានស្លាប់​បាត់​បង់​ជីវិតនៅនឹងផ្ទះរបស់ពួកគាត់ ហើយចំពោះមូលហេតុនៃការស្លាប់​របស់ជនរងគ្រោះទាំង៤នាក់​ខាងលើនេះ ទាំងសមត្ថកិច្ចនិងមន្រ្តីជំនាញសុខាភិបាល កំពុងតែចុះស្រាវជ្រាវ​យ៉ាងយកចិត្ត​ទុកដាក់​បំផុត ប៉ុន្តែរហូតមកដល់ពេលនេះ គេនៅមិនទាន់អាចបញ្ជាក់បាននៅឡើយទេ គឺគ្រាន់តែសង្ស័យថា ជាករណីពុលស្រា ដោយសារមុនស្លាប់ជនរងគ្រោះទាំងអស់សុទ្ធតែបានផឹកស្រាសស្រាថ្នាំដូចគ្នា។

លោកអភិបាលស្រុកបានបញ្ជាក់ថា ពេលនេះទីតាំងផលិតស្រាស និងលក់ស្រាសស្រា​ថ្នាំទាំង​អស់​ក្នុង​តំបន់នោះ ត្រូវបានបិទអស់ហើយ ហើយមន្រ្តីជំនាញសុខាភិបាល ក៏បានប្រមូលយកសំណាក​គំរូស្រាសស្រាថ្នាំដែលជនរងគ្រោះបានផឹក យកទៅពិនិត្យរួចហើយដែរ ដូច្នេះនៅពេលដែល​លទ្ធផល​ចេញមក យើងនិងដឹងច្បាស់ថា ជនរងគ្រោះទាំង៤នាក់នេះ គឺស្លាប់ដោយសារមូល​ហេតុ​អ្វីហើយ។

ដោយឡែកលោកវិជ្ជបណ្ឌិត ហួត កណ្យាល ប្រធានការិយាល័យប្រតិបត្តិសុខាភិបាលស្រុកពារាំង​បានឱ្យដឹងនៅរសៀល​ថ្ងៃទី២០មិថុនានេះថា ចំពោះជនរងគ្រោះដែលបានស្លាប់បាត់បង់ជីវិតនៅ​ភូមិយោត ឃុំមេសរប្រចណ្ឌ័នោះ ក្រុមគ្រូពេទ្យជំនាញរបស់លោកបានចុះទៅពិនិត្យរួចហើយ ដោយការពិនិត្យនោះ ដំបូងគឺពិនិត្យរកមេរោគកូវីដ១៩ ដើម្បីកុំឱ្យ​ប្រជាពលរដ្ឋនៅតំបន់នោះ​មានការព្រួយ​បារម្ភ​ហើយលទ្ធផល គឺជនរងគ្រោះអវិជ្ជមានទាំងអស់។

ជាមួយគ្នានោះដែរ ក្រុមគ្រូពេទ្យក៏បានយកសំណាកស្រា ដែលជនរងគ្រោះបានផឹក បញ្ជូនទៅ​ពិនិត្យ​នៅក្នុងមន្ទីរពិសោ​ធន៌ឯរាជធានីភ្នំពេញផងដែរ ដើម្បីបញ្ជាក់អោយច្បាស់ថា តើជនរងគ្រោះពិតជាស្លាប់ដោយសារពុលស្រា មែនឬមិន​មែន? ប៉ុន្តែពេលនេះ លទ្ធផលពិនិត្យមិនទាន់ចេញនៅឡើយទេ៕ អត្ថបទ៖ សៅគ្រី