ស្រវឹង​ខ្លាំង យកសាបទៅដាក់ត្រី​ ដួលដាំក្បាលឈ្លក់ទឹកស្លាប់

ខេត្តបន្ទាយមានជ័យ៖ បុរសវ័យចំណាស់ម្នាក់ស្រវឹងខួប យកសាបទៅដាក់ត្រីដោយសារស្រវឹងខ្លាំងដួលដាំក្បាលទៅទឹកជាប់សាប បណ្តាលឈ្លក់ទឹកស្លាប់។

ប្រជាពលរដ្ឋប្រទះឃើញសពនៅវេលាម៉ោង៤រសៀល ថ្ងៃទី១៨ ខែវិច្ឆិកា ឆ្នាំ ២០២០នៅចំណុចដីព្រៃឬស្សី ភូមិសុខសាន្តសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។

អធិការនគរបាលក្រុងប៉ោយប៉ែតបានប្រាប់អ្នកយកព័ត៍មានឲ្យដឹងថា សពមានឈ្មោះម៉ាត ហៃ ភេទប្រុសអាយុ៤១ឆ្នាំ មកស្នាក់នៅចាំដីឲ្យឈ្មោះយ៉ាងគឹមហុយ ជាមនុស្សស្រវឹងខួប រស់ក្នុងភូមិសុខសាន្ត សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។

អធិការនគរបាលក្រុងប៉ោយប៉ែតបានបញ្ជាក់ឲ្យដឹងបន្តទៀតថា នៅមុនពេលកើតហេតុនោះសពបានយកសាបទៅដាក់យកត្រីទាំងស្រវឹងយកមកធ្វើម្ហូប លុះដើរទៅដល់កន្លែងដាក់ត្រីស្រាប់តែដួលដាំក្បាលទៅទឹកធ្វើឲ្យក្បាលជាប់និងសាប លង់ទឹកស្លាប់តែម្តង។

ក្រោយពីមន្ត្រីជំនាញពិនិត្យ សពពិតជាស្លាប់ដោយសារស្រវឹងដួលជាប់សាបពិតប្រាកដ ពុំមានជាប់ពាក់ព័ន្ធនិងអំពើឃាតកម្មនោះទេ រួចប្រគល់ទៅឲ្យបងប្អូនញាតិមិត្តយកទៅធ្វើបុណ្យតាមប្រពៃណី៕

អត្ថបទ៖ វ៉ាន់ ណាង