សំណុំរឿងឃាតកម្មនៅស្រុកបាទី មិនទាន់ចាប់ខ្លួនជនបង្កបាននៅឡេីយ ខណៈជនរងគ្រោះបាត់បង់ជីវិតកន្លង៣ថ្ងៃមកហេីយ

ជនរងគ្រោះម្នាក់ត្រូវបានជនដៃដល់ចូលកាប់ដល់ក្នុងផ្ទះដេកស្លាប់ក្នុងថ្លុកឈាមយ៉ាងអណោចអធ័ម កន្លងទៅ៣ថ្ងៃមកហេីយ គិតត្រឹមព្រឹកថ្ងៃទី២២ ខែមិថុនា នេះ ខណៈជនបង្កកំពុងរត់គេចខ្លួនបាត់ស្រមោល។

ករណីឃាតកម្មនេះ បានកេីតឡេីងនៅយប់ថ្ងៃទី១៩ ខែមិថុនា ឆ្នាំ២០២១ ស្ថិតនៅក្នុងភូមិខ្នាររង ឃុំដំណាក់រាជា ស្រុកបាទី ខេត្តតាកែវ ដែលបង្កឡេីងដោយជនសង្ស័យមានគ្នា២នាក់ ដែលមានឈ្មោះ ម៉ម សម្បត្តិ ភេទប្រុសអាយុ២១​ឆ្នាំ មុខរបរកម្មកររោងចក្រ និងឈ្មោះ ម៉ម សីហា ភេទប្រុសអាយុ១៩ឆ្នាំ មុខរបរកម្មកររោងចក្រ ទាំងពីរនាក់បងប្អូនបង្កើតនឹងគ្នា​ រស់នៅក្បែរផ្ទះជនរងគ្រោះចំណុចភូមិកើតហេតុខាងលើ។

ជនសង្ស័យទាំង២នាក់បានធ្វើសកម្មភាពប្រើប្រាស់ដាវកាប់ទៅលើជនរងគ្រោះឈ្មោះ មាំង ខេរ: ភេទប្រុស អាយុ២៧ ឆ្នាំមុខរបរកម្មកររោងចក្រដូចគ្នា បណ្ដាលឲ្យដាច់កដៃខាងឆ្វេង និងចំកញ្ចឹងកស្លាប់ភ្លាមៗនៅកន្លែងកើតហេតុ។ក្រោយ​ពីធ្វើសកម្មភាពរួច ជនសង្ស័យបានរត់គេចខ្លួនបាត់ស្រមោល។

ចំពោះមូលហេតុត្រូវបានអ្នកក្បែរខាងបង្ហេីបថា ជនសង្ស័យនិងជនរងគ្រោះធ្លាប់មានទំនាស់ពាក្យសំដីនឹងគ្នានៅពេលទៅលេងបាល់ទះ ហើយក្រុមគ្រួសារទាំងពីរ ក៏ធ្លាប់មានគំនុំនិងគ្នាផងដែរ៕

អត្ថបត ៖ វីរៈ