ព័ត៌មានជាតិ

គ្រួសារសពដែលមានកូន២នាក់ស្លាប់ ដោយសារលង់ទឹកនៅស្រុកកៀនស្វាយទទួលបានអំណោយពីកាកបាទក្រហម

បានផុស

៤ years មុន

នៅ

ថ្ងៃព្រហស្បតិ៍ ២៤ មិថុនា ២០២១

ដោយ

គ្រួសារសពដែលមានកូន២នាក់ ស្លាប់ដោយសារលង់ទឹកក្នុងរណ្ដៅជីកដាក់លូបង្គន់ នៅឃុំដីឥដ្ឋ ស្រុកកៀនស្វាយ បានទទួលបានអំណោយមនុស្សធម៌ពីសាខាកាកបាទក្រហមខេត្តកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីទទួលអំណោយមនុស្សធម៌នេះ បានធ្វើឡើងនៅព្រឹកថ្ងៃទី២៤ ខែមិថុនា ឆ្នាំ២០២១នេះដោយមានការចូលរួមពីលោក ទៀង សុគន្ធ នាយកសាខា តំណាងលោក គង់ សោភ័ណ្ឌ អភិបាលខេត្ត និងជាប្រធានគណៈកម្មាធិការសាខា។

គួររំលឹកផងដែរថា ករណីក្មេងលង់ទឹកស្លាប់ ក្នុងរណ្តៅជីកដាក់លូបង្គន់នេះ បានកើតឡើងនៅ វេលាម៉ោង ១៥និង៣០នាទី កាលពីថ្ងៃទី២២ ខែមិថុនា ២០២១ នៅចំណុចភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល ខណៈដែលឪពុកម្តាយបានចេញទៅធ្វើការឆ្ងាយពីផ្ទះ បណ្តាលអោយស្លាប់កូនចំនួន ០២នាក់ រួមមាន៖ ១-ឈ្មោះ ស៊ីម គុជនីម ភេទស្រី អាយុ៧ឆ្នាំ ជនជាតិខ្មែរ ២-ឈ្មោះស៊ីម គុជលៀង ភេទប្រុស អាយុ៤ឆ្នាំ ជនជាតិខ្មែរ។

លោក ទៀង សុគន្ធ បានបញ្ជាក់ថា អំណោយមនុស្សធម៌ដែលបាន ឧបត្ថម្ភជូននាឱកាសនេះ ថ្វីត្បិតមានចំនួនតិចតួចស្តួចស្តើងមិនបានសមទៅនឹងទំហំនៃការបាត់បង់សមាជិកគ្រួសារក៏ពិតមែន ប៉ុន្តែ វាក៏អាចជួយសម្រាលនូវការលំបាកចំពោះមុខរបស់បងប្អូនបានមួយកម្រិតផងដែរ។

លោកនាយកសាខា ក៏បានលើកទឹកចិត្តដល់ក្រុមគ្រួសារសពសូមកុំអស់សង្ឃឹម ត្រូវខំកាត់ចិត្តព្រោះហេតុការណ៍នេះបានកើតឡើងរួចហើយវាមិនអាចវិលត្រឡប់មកដូចដើមបានឡើយ គប្បីត្រូវបន្តខិតខំបំពេញការងារដើម្បីជីវភាពគ្រួសារ នឹងត្រូវគិតគូរអំពីអនាគតបន្តទៀតទើបជាការល្អ។

អំណោយមនុស្សធម៌ដែលសាខាបានផ្តល់ជូនដល់គ្រួសារសពរួមមាន អង្ករ៥០គីឡូក្រាម មី២កេស ត្រីខ១យួរ ទឹកសុទ្ធ២កេស ទឹកផ្លែឈើ១កេស ប្រេងឆា២ដប ម៉ាស់១ប្រអប់ ជែលលាងដៃ១ដប និងថវិកា៨០ម៉ឺនរៀល៕

ដោយ ៖ សំអឿន