អាជ្ញាធរខណ្ឌដង្កោ ចុះដោះស្រាយបញ្ហាសំរាម ខណៈក្រុមហ៊ុន ស៊ិន ទ្រី ជិតដល់ថ្ងៃបញ្ចប់កុងត្រា

ភ្នំពេញ៖ អាជ្ញាធរខណ្ឌដង្កោ សហការជាមួយអាជ្ញាធរសង្កាត់ដង្កោ និងរថយន្តក្រុមហ៊ុន ស៊ិនទ្រី ចុះដោះស្រាយបញ្ហាសំរាម ជូនប្រជាពលរដ្ឋនៅក្នុងមូលដ្ឋាន បន្ទាប់ពីទទួលបានសេចក្តី​រាយការណ៍ពីពលរដ្ឋ។

មន្ត្រីអាជ្ញាធរខណ្ឌដង្កោ ប្រាប់ឱ្យដឹងថា អាជ្ញាធរខណ្ឌដង្កោ ក្រោមការដឹកនាំដោយលោកស្រី គឹម ញឹប អភិបាល នៃ គណៈអភិបាលខណ្ឌដង្កោ តែងតែយកចិត្តទុកដាក់ទៅដល់ប្រជាពលរដ្ឋ​គ្រប់​បញ្ហាទាំងអស់ ជាពិសេសបញ្ហាសំរាមនេះ មិនមែនអាជ្ញាធរមិនបានគិតគូរនោះទេ គឺអាជ្ញាធរបាននឹងកំពុងគិតគូរខ្លាំងណាស់ ធ្វើយ៉ាងណាចង់ឱ្យតែប្រជាពលរដ្ឋ​មាន​បរិស្ថាន​ស្អាត។ ប៉ុន្តែបញ្ហានេះ គឺដោយសារតែខាងក្រុមហ៊ុន ស៊ិន ទ្រី ជិតដល់ថ្ងៃបញ្ចប់ កុងត្រា ទើបមួយ​រយៈពេលចុងក្រោយនេះ ក្រុមហ៊ុន ស៊ិន ទ្រី មិនបានបញ្ចេញរថយន្ត ឬ កម្មករ ដើម្បីធ្វើការ​ប្រមូល​សំរាម ទើបមានសំរាមនៅគរបែបនេះ។

ដោយមើលឃើញថា បញ្ហាសំរាមមានផលប៉ះពាល់ខ្លាំង​ទៅដល់ប្រជាពលរដ្ឋរស់នៅក្នុងមូលដ្ឋាន អាជ្ញាធរខណ្ឌដង្កោ បានទទូចស្នើរទៅ ក្រុមហ៊ុន ស៊ិន ទ្រី ផ្ទាល់តែម្តង ដើម្បីបញ្ចេញរថយន្ត និង កម្មករ ចុះធ្វើការប្រមូលកើបសំរាមឱ្យបានស្អាត គ្រប់ទីកន្លែងទាំងអស់ ជូនប្រជាពលរដ្ឋ។

ទោះបីយ៉ាងណាក្តី ក្នុងនាមអាជ្ញាធរខណ្ឌដង្កោ បានសូមអភ័យទោសចំពោះប្រជាពល​រដ្ឋ​​រស់​នៅមូលដ្ឋានខណ្ឌដង្កោទាំងអស់ ដែលអាជ្ញាធរមានការយឺតយ៉ាងក្នុងការកើប​ប្រមូល​សំរាម​បែបនេះ។

ជាគ្នានេះផងដែរអាជ្ញាធរខណ្ឌដង្កោ សូមសំណូមពរទៅដល់ប្រជាពលរដ្ឋទាំងអស់បន្តរៀប​ចំទុកដាក់សំរាមឱ្យមានរបៀបរាបរយ ត្រឹមត្រូវល្អ តាមទីតាំងកំណត់ ចៀសវាងបោះចោល​ពាស​វាលពាសកាល ជាពិសេស កុំចោះសំរាមនៅលើគំរបលូ ឬ ក្នុងលូ ដែលអាចនាំ​ឱ្យស្ទះ​ប្រព័ន្ធលូបង្ហូរទឹក៕

អត្ថបទ៖ រ៉ាវុទ្ធ