ព័ត៌មានជាតិ

លោក កឹម សុខា ជួបជាមួយឯកអគ្គរាជទូត នៃប្រទេសជប៉ុនប្រចាំនៅកម្ពុជា

បានផុស

៤ years មុន

នៅ

ថ្ងៃចន្ទ ២៨ មិថុនា ២០២១

ដោយ

នៅព្រឹកថ្ងៃច័ន្ទ ទី២៨ ខែមិថុនា ឆ្នាំ២០២១ នេះ លោក កឹម សុខា អតីតប្រធាន អតីតគណបក្សសង្គ្រោះជាតិ ដែលកំពុងរងការចោទប្រកាន់ពីបទសន្ទិដ្ឋិភាពជាមួយបរទេស ឬបទក្បត់ជាតិ បានជួបពិភាក្សាការងារជាមួយលោក Masahiro Mikami ឯកអគ្គរាជទូតនៃប្រទេសជប៉ុនប្រចាំនៅព្រះរាជាណាចក្រកម្ពុជា។

លោក កឹម សុខា បានអះអាងថា វាជាកិត្តិយសដែលលោកបានពិភាក្សាគ្នាយ៉ាងរាក់ទាក់ អស់រយៈពេលយ៉ាងយូរ ជាមួយតំណាងប្រទេសមហាអំណាចប្រជាធិបតេយ្យ នៃតំបន់អាស៊ី ដែលជាមិត្តល្អរបស់ប្រជាពលរដ្ឋខ្មែរ។ លោកបន្តថា ប្រទេសជប៉ុន គឺជាប្រទេសដែលជួយដល់កម្ពុជាយ៉ាងច្រើន និងយ៉ាងសកម្មក្នុងដំណើរការស្តារ និងកសាងប្រទេសកម្ពុជាឡើងវិញ ក្រោយកិច្ចព្រមព្រៀងសន្តិភាពទីក្រុងប៉ារីស២៣ តុលា ១៩៩១ ដែលឆ្នាំនេះមានរយៈពេល៣០ឆ្នាំហើយ។

ជាមួយគ្នានោះ លោក កឹម សុខា បានថ្លែងអំណរគុណចំពោះប្រជាពលរដ្ឋ និងរាជរដ្ឋាភិបាលជប៉ុនដែលបានជួយ និងបន្តជួយដល់ប្រជាពលរដ្ឋខ្មែរកន្លងមក និងទៅអនាគតទាំងការអភិវឌ្ឍន៍ និងដំណើរការប្រជាធិបតេយ្យជាដើម៕

ដោយ ៖ កោះកែវ