បញ្ជូនបុរសម្នាក់ទៅតុលាការ​ករណីវាយជនរងគ្រោះរបួសក្បាល

យុវជនម្នាក់គ្រាន់តែគេរំឭករឿងនៅពីក្មេងបុរសរងគ្រោះបានវាយធ្វើបាបខ្លួនជាញឹកញាប់បណ្តាលឲ្យខឹងយ៉ាងខ្លាំងយកដំបងទីបវាយទៅលើជនរងគ្រោះបែកក្បាលដេរ១១ថ្នេរ ហើយគេចខ្លួនបាត់ ពេលនោះជនរងគ្រោះបានដាក់​ពាក្យប្តឹង​កម្លាំងនគរបាលជំនាញការិយាល័យព្រហ្មទណ្ឌកំរិតស្រាលក្រោយពីបានទទួលពាក្យប្តឹងហើយកំលាំងអធិការនគរបាល ស្រុកអូរជ្រៅបានចុះឃាត់ខ្លួនជនសង្ស័យបាននៅវេលាម៉ោង៤ល្ងាច ថ្ងៃទី២៩ ខែមិថុនា ឆ្នាំ២០២១។

លោកវរសេនីយ៍ឯក សែស វិបុល អធិការនគរបាល ស្រុកអូរជ្រៅបានឲ្យដឹងថាបុរសជនរងគ្រោះឈ្មោះ ខាន ខា អាយុ ២៥ឆ្នាំ រស់នៅភូមិបត់ត្រង់ ឃុំសំរោង ស្រុកអូរជ្រៅ បុរសជនបង្ករឈ្មោះ នួន ដារ៉ា អាយុ៣៤ឆ្នាំ រស់នៅភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។

លោកវរសេនីយ៍ឯក សែស វិបុលបានបញ្ជាក់ឲ្យដឹងបន្តថានៅមុនពេលកើតហេតុ វេលាម៉ោង៧និង៣០នាទីយប់ ជនរងគ្រោះកំពុងអង្គុយហូបបាយក្រោមផ្ទះម្នាក់ឯងពេលដែលកំពុងតែឱនដួសបាយដាក់ចាន ស្រាប់តែជនសង្ស័យកាន់ដែកជ្រុងដើរសំដៅមកវាយត្រូវចំក្បាលដេរ១១ថ្នេរនិងត្រូវចំដៃក្រោយពីវាយរួចរត់គេចខ្លួនបាត់។

តាមសំដីជនរងគ្រោះបាននិយាយថា ខ្លួននិងជនដៃដល់ពុំដែលមានគំនុំអ្វីនឹងគ្នានោះឡើយ។ចំណែកជនដៃដល់ក្រោយពីរត់គេចបាន១ថ្ងៃត្រូវកំលាំងនគរបាលឃាត់ខ្លួនបានឆ្លើយសារភាពថាកាលនៅក្មេងជនរងគ្រោះមានបំណងចង់វាយ​មកលើខ្លួនច្រើនលើកច្រើនសារ គ្រាន់តែលឺដូច្នោះខ្លួនខឹងក៏កាន់ដែកបំពង់ទីប៤ជ្រុង មកវាយឈ្មោះរើនត្រូវចំក្បាលពីក្រោយដែលកំពុងតែដួសបាយដាក់ចានហូបតែម្តង។

លោកវរសេនីយ៍ទោ ព្រហ្ម ប៊ុនធឿន នាយការិយាល័យ នគរបាលព្រហ្មទណ្ឌកំរិតស្រាល បានបញ្ជាក់ថា ផ្អែកតាមចម្លើយរបស់ជនសង្ស័យត្រូវបានកម្លាំងជំនាញការិយាល័យនគរបាលព្រហ្មទណ្ឌកំរិតស្រាល បញ្ជូនខ្លួនទៅសាលាដំបូងខេត្តបន្ទាយមាននៅរសៀលថ្ងៃទី២៩ខែមិថុនា ដើម្បីចាត់ការតាមនិតិវិធីច្បាប់ហើយ៕ អត្ថបទ៖ វ៉ាន់ ណាង