អាជ្ញាធរ​បិទ​ផ្សារ​អូឡាំពិក ក្រោយ​រក​ឃើញ​អាជីវករ​ និង សន្តិសុខ​ផ្សារ ​១៨ នាក់​ឆ្លង​កូវីដ-១៩

សេចក្តីរាយការណ៍បឋមមុននេះ បានឱ្យដឹងថាផ្សារអូឡាំពិក ត្រូវបានបិទ បន្ទាប់ពីរកឃើញអាជីវករផ្សារ និងសន្តិសុខសរុប ១៨ នាក់ មានវិជ្ជមានកូវីដ១៩ ខណៈអាជ្ញាធរ សហការជាមួយក្រុមគ្រូពេទ្យ កំពុងពិនិត្យយកសំណាក។

ប្រធានគណៈកម្មការផ្សារអូឡាំពិក លោកឡយ ស៊ាងអាង បានមានប្រសាសន៍លើកឡើងនៅព្រឹកថ្ងៃទី០២ កក្កដានេះថា នៅផ្សារអូឡាំពិក បានផ្ទុះនៅការរីករាលដាលនៃជំងឺ-១៩ហើយ ដោយកាលពីម្សិលមិញថ្ងៃទី០១ខែកក្កដាឆ្នាំ២០២១ ក្រុមគ្រូពេទ្យបានរកឃើញកូវីដ-១៩ ចំនួន២នាក់ ហើយនៅព្រឹកថ្ងៃទី០២ខែកក្កដានេះ ក្រោយពីបានធ្វើការយកសំណាកទៅលើអ្នកពាក់ព័ន្ធប្រមាណជាង១០០នាក់ បានរកឃើញអ្នកមានវិជ្ជមានកូវីដ-១៩ ចំនួន១៦នាក់ទៀត សរុបចំនួន១៨នាក់ ។ ក្នុងនោះរួមមានវិជ្ជមានកូវីដ-១៩ ទៅលើសន្តិសុខផ្សារអូឡាំពិកចំនួន៤នាក់ ក្រុមសន្តិសុខឯកជនចំនួន១៣នាក់ និងអាជីករម្នាក់។

ទោះបីយ៉ាងណាក្តី គណៈកម្មការ និងអាជ្ញាធរមូលដ្ឋានខណ្ឌបឹងកេងកង បានកំពុងធ្វើការអំពាវនាវឲ្យបងប្អូនប្រជាពលរដ្ឋដែលធ្លាប់ចេញចូលផ្សារអូឡាំពិក មកពិនិត្យយកសំណាករកជម្ងឺកូវីដ-១៩ ដើម្បីទប់ស្កាត់កុំ​ឲ្យ​រីករាលដាលបន្តទៀត។