ប៉ូលិសសង្ស័យថាមានលាក់ថ្នាំញៀន ពេលឆែកមើលមាន៧ដល់ទៅថង់មែន

ខេត្តបាត់ដំបង៖ ជនសង្ស័យម្នាក់ត្រូវបានកម្លាំងប៉ូលិសស្រុកសង្កែ ធ្វើការឃាត់ខ្លួន តាមការឯកភាពពីថ្នាក់ដឹកនាំ បន្ទាប់ពីបានឆែកឆេរលើរាងកាយប្រទះឃើញថ្នាំញៀនចំនួនរហូតទៅដល់ ៧ថង់។

កិច្ចប្រតិបត្តិការនេះបានធ្វើឡើងកាលពីវេលាម៉ោង៣ និង១០នាទី ល្ងាចថ្ងៃទី១ ខែកក្កដា ឆ្នាំ២០២១ ត្រង់ចំណុចភូមិដំណាក់ដង្កោ ឃុំរាំងកេសី ស្រុកសង្កែ ខេត្តបាត់ដំបង។
នៅក្នុងកិច្ចប្រតិបត្តិការនោះ គឺបន្ទាប់ពីទទួលបាននូវសេចក្តីរាយការណ៍ និងដោយសារតែប៉ូលិសមានការសង្ស័យទៅលើបុរសម្នាក់មានឈ្មោះ លួម ឡាប អាយុ៣៥ឆ្នាំ រស់នៅក្នុងភូមិឃុំខាងលើ។

ក្រោយបានត្រួតពិនិត្យ សមត្ថកិច្ចបានរកឃើញថ្នាំញៀនប្រភេទម៉ាទឹកកកចំនួន ៧ថង់ និងសម្ភារៈសម្រាប់វេចខ្ចប់មួយចំនួន។ បច្ចុប្បន្នជនសង្ស័យខាងលើ ត្រូវបានបញ្ជូនតាមនីតិវិធីច្បាប់ហើយ៕

អត្ថបទ៖ សោ និយមរ័ត្ន