ព័ត៌មានជាតិ

ខេត្តក្រចេះ ត្រៀមយកវិទ្យាល័យព្រះមហាក្សត្រីយានីកុសុមៈ ធ្វើទីកន្លែងសម្រាប់ព្យាបាលអ្នកជំងឺកូវីដ-១៩ កម្រិតស្រាល

បានផុស

៤ years មុន

នៅ

ថ្ងៃអាទិត្យ ៤ កក្កដា ២០២១

ដោយ

ប្រធានមន្ទីរសុខាភិបាលខេត្តក្រចេះ បានឱ្យដឹងនៅព្រឹកថ្ងៃទី០៤កក្កដានេះថា រដ្ឋបាលខេត្តបានត្រៀមយកវិទ្យាល័យព្រះមហាក្សត្រីយានីកុសុមៈ ស្ថិតក្នុងក្រុងក្រចេះធ្វើជាទីតាំងសម្រាប់ព្យាបាលអ្នកជំងឺកូវីដ-១៩ កម្រិតស្រាលបន្ទាប់ពីមានអ្នកឆ្លងជំងឺកូវីដ១៩ មានការកើនឡើងជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វេជ្ជបណ្ឌិត ឈ្នាង ស៊ីវុត្ថា ប្រធានមន្ទីរសុខាភិបាលខេត្តក្រចេះបានបន្តថា« យើងចាំបាច់ត្រូវតែត្រៀមលក្ខណៈទុកជាមុននូវកន្លែងព្យាបាលឱ្យហើយ ព្រោះមិនដឹងថា នៅថ្ងៃខាងមុខនេះស្ថានភាពការឆ្លងជំងឺកូវីដ១៩ នៅខេត្តក្រចេះវាវិវត្តន៍ទៅជាយ៉ាងណានោះទេបើកើនឡើងយើងមានកន្លែងរៀបចំរួចជាស្រេចមិនពិបាកនោះឡើយ»។ លោក វេជ្ជបណ្ឌិត បានបន្តទៀតថា បច្ចុប្បន្ននេះ ក្រុមការងារបានរៀបចំចាត់ចែងយកតុ បោសសំអាតក្នុងបន្ទប់នីមួយៗឱ្យបានស្អាត ដើម្បីរៀបចំដាក់គ្រែនិងបំពាក់សម្ភារៈផ្សេងៗ សម្រាប់អ្នកជំងឺសម្រាកនិងរៀបចំប្រព័ន្ធទឹកភ្លើងនិងបន្ទប់អនាម័យឱ្យបានស្អាតស្របទៅតាមវិធានរបស់ក្រសួងសុខាភិបាល។ លោក វេជ្ជបណ្ឌិត បានបន្ថែមថា វិទ្យាល័យនេះមាន១៨បន្ទប់ ដោយ១បន្ទប់អាចដាក់គ្រែ បានចំនួន៨គ្រែសរុប១៤៤គ្រែខណៈបច្ចុប្បន្ននេះ ខេត្តមានទីតាំងព្យាបាលអ្នកជំងឺកូវីដ១៩ ចំនួន៤កន្លែងក្នុងនោះមានសណ្ឋាគារបឹងកាឡូផងដែរ និងមណ្ឌលចត្តាឡីស័កមានចំនួន៤កន្លែង។

រហូតមកដល់ពេលនេះខេត្តក្រចេះ មានអ្នកឆ្លងជំងឺកូវីដ១៩ ចំនួន១២៤នាក់ ក្នុងនោះអ្នកជាសះស្បើយចំនួន២០នាក់ កំពុងសម្រាកព្យាបាលនៅមន្ទីរពេទ្យចំនួន១០១នាក់ និងស្លាប់ចំនួន៣នាក់។ លោក វេជ្ជបណ្ឌិត បានបញ្ជាក់ថា ប្រភពនៃការចម្លងជំងឺកូវីដ១៩ នៅខេត្តក្រចេះ គឺដោយសារឆ្លងតាមអ្នកដំណើរមកពីជុំវិញខេត្ត និងមកពីរាជធានីភ្នំពេញពិសេស គឺឆ្លងតាមរយៈក្លឹបកម្សាន្ត។

លោកប្រធានមន្ទីរបានអំពាវនាវដល់បងប្អូនប្រជាពលរដ្ឋទាំងអស់ ដែលមានប្រវត្តិប៉ះពាល់ដោយផ្ទាល់ ឫប្រយោលជាមួយអ្នកមានវិជ្ជមានជំងឺកូវីដ-១៩ ឫមានរោគសញ្ញាក្អក ផ្តាសាយ ហៀរសំបោរ ឈឺបំពង់ក ពិបាកដកដង្ហើម កម្ដៅក្នុងខ្លួនឡើងខ្ពស់លើសពី៣៧អង្សាសេ និងរោគសញ្ញាផ្សេងៗទៀត ដែលសង្ស័យ សូមរួសរាន់ទៅពិនិត្យសុខភាពនៅមន្ទីរពេទ្យ ឬមណ្ឌលសុខភាព ដែលនៅជិតកន្លែងបងប្អូនរស់នៅ ឫរាយការណ៍ជូនទៅអាជ្ញាធរជាបន្ទាន់។ លោក វេជ្ជបណ្ឌិត បានណែនាំឱ្យប្រជាពលរដ្ឋទាំងអស់ ត្រូវចូលរួមអនុវត្តឲ្យបានខ្ជាប់ខ្ជួននូវវិធានការ ៣ការពារ និង៣កុំ របស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ដើម្បីបញ្ចប់ព្រឹត្តិការណ៍សហគមន៍ ២០កុម្ភៈ៕

អត្ថបទ៖ សំអឿន

Related Topics:ខេត្តក្រចេះ