ព័ត៌មានជាតិ

សហគមន៍ខ្មែរឥស្លាម ជីករណ្តៅត្រៀមទុកបញ្ចុះសពសាសនិកឥស្លាម ដែលស្លាប់ដោយសារជំងឺកូវីដ

បានផុស

៤ years មុន

នៅ

ថ្ងៃចន្ទ ៥ កក្កដា ២០២១

ដោយ

នៅថ្ងៃទី០៤ ខែកក្កដា ឆ្នាំ២០២១នេះ ឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានក្រុមការងារដោះស្រាយបញ្ហាគ្រោះមហន្តរាយ ដែលបណ្តាលមកពីការរីករាលដាលនៃជំងឺកូវីដ-១៩ របស់សហគមន៍ខ្មែរឥស្លាមខេត្ត បានដឹកនាំក្រុមការងារចុះទៅកាន់ទីតាំងដីសម្រាប់ត្រៀមទុកតម្កល់សពសាសនិកឥស្លាម ក្នុងករណីស្លាប់ដោយសារឆ្លងជំងឺកូវីដ-១៩ នៅក្នុងភូមិគោកក្រើល ឃុំលាងដៃ ស្រុកអង្គរធំ ខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការជីករណ្តៅត្រៀមទុកសម្រាប់បញ្ចុះសពរបស់បងប្អូនសាសនិកឥស្លាមដែលបានស្លាប់ដោយសារជំងឺកូវីដ-១៩ ធ្វើឡើងដោយគោរពតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលកន្លងមក។ ក្នុងការចុះទៅពិនិត្យ និងជីករណ្តៅសម្រាប់បញ្ចុះសពនោះ ក៏មានការអញ្ជើញចូលរួមពីសំណាក់លោក ឡុង រដ្ឋារក្ស អភិបាលនៃគណ:អភិបាលស្រុកអង្គរធំ និងលោកអធិការស្រុក លោកមេបញ្ជាការកងរាជអាវុធហត្ថស្រុក ព្រមទាំងមានអាជ្ញាធរភូមិ ឃុំគោកគ្រើល ចូលរួមផងដែរ ។

ឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានក្រុមការងារនេះ បានមានប្រសាសន៍ថា ចំពោះការជីករណ្តៅត្រៀមទុកនេះ គឺមិនមែនជាការប្រមាថដល់អាយុជីវិតរបស់បងប្អូនសាសនិកឥស្លាម ដែលបានឆ្លងជំងឺកូវីដ-១៩នោះទេ គឺគ្រាន់តែដើម្បីរៀបចំត្រៀមទុកការពារទុកជាមុន និងដើម្បីគាំទ្រដល់ក្រុមការងារដែលត្រូវរៀបចំបញ្ចុះសពឲ្យប្រព្រឹត្តទៅដោយរលូន និងទាន់ពេលវេលាតែប៉ុណ្ណោះ ។

ឯកឧត្តម ក៏បានមានប្រសាសន៍បញ្ជាក់ថា ពេលនេះក្រុមការងារបានធ្វើការជីករណ្តៅត្រៀមទុកបានចំនួន៥រណ្តៅ ហើយចំពោះការជីករណ្តៅទុកសម្រាប់បញ្ចុះសពនេះ គឺជាថវិការបស់បងប្អូនសប្បុរសជនខ្មែរសាសនិកឥស្លាម ក្នុងខេត្តសៀមរាប ដែលបានចូលរួមបរិច្ចាគដល់ក្រុមការងារដោះស្រាយបញ្ហាគ្រោះមហន្តរាយដែលបណ្តាលមកពីការរីករាលដាលនៃជំងឺកូវីដ-១៩ របស់សហគមន៍ខ្មែរឥស្លាមខេត្ត ផងដែរ៕

អត្ថបទ ៖ គឿនវេត