សូមចូលរួមសោកស្ដាយ! ថ្ងៃ៨ កក្កដា នៅខេត្តកំពង់ស្ពឺ មានអ្នកជំងឺកូវីដ-១៩ ចំនួន៣នាក់បានស្លាប់

(កំពង់ស្ពឺ)៖ អ្នកជំងឺកូវីដ-១៩​ នៅខេត្តកំពង់ស្ពឺចំនួន៣នាក់បានស្លាប់ នៅថ្ងៃទី៨ ខែកក្កដា ឆ្នាំ២០២១ ដែលនាំឲ្យ​ករណី​ស្លាប់​សរុប​នៅ​ក្នុងខេត្តមួយនេះ កើនឡើងដល់៦៣នាក់។ នេះបើតាមការឲ្យដឹងពីលោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ ដែលបានបង្ហោះគណនីហ្វេសប៊ុករបស់លោក។

លោក វ៉ី សំណាង បានសរសេរថា «ខ្ញុំសូមចូលរួមសោកស្ដាយ និងក៏សូមចូលរួមរំលែកទុក្ខដ៏ក្រៀមក្រំ ជាមួយក្រុមគ្រួសារនៃសពផង! នៅថ្ងៃទី8 ខែកក្កដា  ឆ្នាំ2021នេះ ខេត្តកំពង់ស្ពឺយើងមានអ្នកជំងឺ covid-19 ចំនួន3នាក់  បានស្លាប់បាត់បង់ជីវិត»។

សូមជម្រាបថា គិតត្រឹមថ្ងៃទី៨ ខែកក្កដា ឆ្នាំ២០២១ នៅខេត្តកំពង់ស្ពឺ មានករណីឆ្លងជំងឺកូវីដ-១៩សរុប២៩៧០នាក់។ ក្នុងនោះ បានជាសះស្បើយចំនួន២២៣០នាក់ និងកំពុងសម្រាកព្យាបាលចំនួន៦៧១នាក់។ ចំណែកអ្នកស្លាប់សរុបមានចំនួន៦៣នាក់។

អភិបាលខេត្តកំពង់ស្ពឺលោក វ៉ី សំណាង បានអំពាវនាវយ៉ាងដោយទទូច ដល់ប្រជាពលរដ្ឋទាំងអស់ ក្នុងករណីសង្ស័យថា ខ្លួនមានអាការស្រដៀងនឹងជំងឺកូវីដ-១៩ សូមមេត្តាប្រញាប់រត់រកសេវាសុខភាពរបស់រដ្ឋ ដែលនៅជិតលោកអ្នកបំផុត ដើម្បីអាចគេចផុតពីជំងឺធ្ងន់ធ្ងរ ឬក៏សេចក្តីស្លាប់បាន។ ជាមួយគ្នានេះលោក ក៏បានអំពាវនាវជា​ថ្មីឲ្យប្រជាពលរដ្ឋកុំភ្លេចវិធានការ ៣កុំ ៣ការពារ ឲ្យសោះ៕ (ដោយ)៖ ឃួន សុភ័ក្រ