អាជ្ញាធរខេត្តកោះកុងកំពុងស្រាវជ្រាវរកបុគ្គលញុះញង់ពលរដ្ឋទន្រ្ទានដីនៅក្រៅទំនប់ការពារទឹកប្រៃ

អាជ្ញាធរខេត្តកោះកុងកំពុងស្រាវជ្រាវរកបុគ្គលខិលខូចដែលបានញុះញង់ប្រជាពលរដ្ឋទៅទន្រ្ទានកាប់ឆ្ការទីតាំងដីនៅក្រៅទំបន់ការពារទឹកប្រៃយកធ្វើជាកម្មសិទ្ធិដើម្បីកសាងសំណុំរឿងបញ្ជួនទៅតុលាការធ្វើការកាត់ទោសទៅតាមនីតិវិធីច្បាប់។

លោក សុខ សុទ្ធី អភិបាលរង នៃគណៈអភិបាលខេត្ត និងជាអនុប្រធានគណៈកម្មាធិការគ្រប់គ្រងដីរដ្ឋថ្នាក់ខេត្តបានលើកឡើងនៅក្នុងឱកាសដឹកនាំក្រុមការងារចម្រុះ ចុះពិនិត្យទីតាំងដីនៅក្រៅទំបន់ការពារទឹកប្រៃ ដែលប្រជាពលរដ្ឋ ទន្រ្ទានកាប់ឆ្ការយកជាកម្មសិទ្ធិ ស្ថិតក្នុងភូមិប្រលាន ឃុំកណ្តោល ស្រុកបូទុមសាគរ ថា៖ “ចំពោះដីទាំងឡាយណាស្ថិតនៅខាងក្រៅទំបន់ការពារទឹកប្រៃ ដែលមានបុគ្គលខិលខូចញុះញង់ប្រជាពលរដ្ឋឱ្យទន្រ្ទានកាប់ឆ្ការយកក្នុងពេលថ្មីៗនេះ គឺរដ្ឋបាលស្រុក និងឃុំពាក់ព័ន្ធ ត្រូវធ្វើការចុចយកចំណុចនិយាមកាឱ្យបានច្បាស់លាស់ ដើម្បីធ្វើសេចក្តីប្រកាសបដិសេធជាសាធារណៈ និងម៉្យាងទៀតរដ្ឋបាលខេត្តកំពុងស្រាវជ្រាវរកបុគ្គលខិលខូចដែលជាអ្នកញុះញង់ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី”។

លោកអភិបាលរងខេត្ត បានថ្លែងការកោតសរសើរ និងវាយតម្លៃខ្ពស់ ចំពោះរដ្ឋបាលស្រុក និងសមត្ថកិច្ចពាក់ព័ន្ធដែលអនុវត្តការងារ និងទប់ស្កាត់សកម្មភាពទន្រ្ទានយកដីសាធារណៈកន្លងមកទទួលបានជោគជ័យ។

លោក អភិបាលរងខេត្ត បានសំណូមពរដល់អាជ្ញាធរមូលដ្ឋាន សមត្ថកិច្ចកងកម្លាំង និងអ្នកពាក់ព័ន្ធ បន្តកិច្ចសហការចូលរួមអនុវត្តបន្ថែមទៀត ក្នុងការបំពេញតួនាទីភារកិច្ចនីមួយៗ  ដោយឈរលើស្មារតីទទួលត្រូវខុសខ្ពស់។

នៅក្នុងឱកាសនោះដែរ លោកអភិបាលរងខេត្តបានផ្តល់ដីក្នុងទំបន់ការពារទឹកប្រៃ ទំហំ ៨២.១០ហិកតា តាមសំណើរបស់រដ្ឋបាលស្រុក ស្នើសុំជាសម្បទានដីសង្គមកិច្ច សម្រាប់ធ្វើប្រទានកម្មជាកម្មសិទ្ធិជូនប្រជាពលរដ្ឋ ២៨៣គ្រួសារ ដែលបានកាន់កាប់អាស្រ័យតាំងពីឆ្នាំ២០១២មក ស្ថិតក្នុងភូមិប្រលាន ឃុំកណ្តោល៕

អត្ថបទ៖ សំអឿន