នាំគ្នា​ចុះ​ស្តារប្រឡាយ​មាន​គ្នា ១០ នាក់ ដីបាក់សង្កត់ស្លាប់ម្នាក់

ខេត្តបាត់ដំបង÷ ប្រជាកសិករម្នាក់ក្នុងចំណោមកសិករ១០នាក់ បានបាត់បង់ជីវិត ខណៈ​ចុះស្តារអាចម៌ដីពីប្រឡាយ ដើម្បីបណ្តោះទឹកស្រោចស្របលើផលដំណាំ។

សមត្ថកិច្ចមូលដ្ឋានបានឲ្យដឹងថា ករណីខាងលើនេះបានកើតឡើងនៅល្ងាចថ្ងៃទី០៩ខែកក្កដាឆ្នាំ២០២១ វេលាម៉ោង​០៧:០០​នាទី នៅចំណុចតាមប្រឡាយស្ថិតក្នុងក្រុមទី០៩ភូមិច្រាំងខ្ពស់ ឃុំបាសាក់ ស្រុករុក្ខគិរី ខេត្តបាត់ដំបង។ កសិករដែលបានស្លាប់ដោយសារបាក់ដីប្រឡាយសង្កត់លើ មានឈ្មោះផេង ផានភេទប្រុសអាយុ៣៨ឆ្នាំ រស់នៅភូមិអន្លង់ត្រាច ឃុំរបស់មង្គល ស្រុកមោងប្ញស្សីខេត្តបាត់ដំបង បាន​ស្លាប់ពេលបញ្ជូនដល់មណ្ឌលសុខភាពឃុំបាសាក់។

សមត្ថកិច្ចបញ្ជាក់ថា មុនកើតហេតុសពខាងលើនិងប្រជាកសិករប្រមាណ១០នាក់ បាននាំគ្នាចុះស្តារប្រឡាយ (ដីបាក់ចូល) ដើម្បីអោយទឹកហូរបានលឿន ខណ:ពេលកំពុងតែកាយដីចេញពីប្រឡាយ ក៏ស្រាប់តែដីបាក់សង្កត់តែម្តង។ ក្រោយ​មត្ថកិច្ចធ្វើកោសល្យវិច័យរួចរាល់ ក៏បានប្រគល់សពខាងលើអោយទៅក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ សៅ​ សារិទ្ធ