ខេត្តរតនគិរី បន្តរកឃើញអ្នកវិជ្ជមានកូវីដ-១៩ ចំនួន៨នាក់បន្ថែមទៀត

(រតនគិរី)៖ រដ្ឋបាលខេត្តរតនគិរី បានចេញសេចក្តីប្រកាសព័ត៌មាន ស្ដីពី ការរកឃើញអ្នកវិជ្ជមានកូវីដ-១៩ ចំនួន៨នាក់ កាលពីថ្ងៃទី១១ ខែកក្កដា ឆ្នាំ២០២១។ នេះបើយោងតាម សេចក្តីប្រកាសព័ត៌មាន របស់រដ្ឋបាលខេត្តរតនគិរី នៅថ្ងៃទី១២ ខែកក្កដា ឆ្នាំ២០២១ ដែលកម្ពុជាថ្មីទទួលបាន។

ក្រុមការងារឆ្លើយតបបន្ទាន់ នៃមន្ទីរសុខាភិបាលខេត្តរតនគិរី បានខិតខំបន្តស្រាវជ្រាវ និងរកឃើញករណីវិជ្ជមាន​កូវីដ-១៩ ចំនួន៨នាក់ថ្មីបន្ថែមទៀត សម្រាប់ថ្ងៃទី១១ ខែកក្កដា ឆ្នាំ២០២១ និងករណីព្យាបាលជាសះស្បើយចំនួន​៥នាក់។

អ្នកទាំង៥នាក់ ត្រូវបានអនុញ្ញាតឲ្យចេញពីមណ្ឌលព្យបាល និងត្រូវបន្តធ្វើចត្តាឡីស័ក ដោយខ្លួនឯងរយៈពេល១៤ថ្ងៃបន្ថែមទៀត។ គិតត្រឹមថ្ងៃទី១២ ខែកក្កដា ឆ្នាំ២០២១ នៅក្នុងខេត្តរតនគិរី រកឃើញអ្នកវិជ្ជមានជំងឺកូវីដ១៩ សរុបចំនួន៦១១នាក់ ព្យាបាលជាសះស្បើយសរុបចំនួន១៩៥នាក់ និងស្លាប់៤នាក់៕ (ដោយ)៖ វុទ្ធ ឦសាន