ក្រសួងកសិកម្មស្នើឱ្យបុគ្គលិក និងកម្មករជនជាតិវៀតណាម ផ្អាកចេញ-ចូលមកកម្ពុជាបណ្តោះអាសន្ន

ក្រសួងកសិកម្មរុក្ខាប្រមាញ់ និងនេសាទបានស្នើដល់ប្រធាន ឬតំណាងក្រុមហ៊ុនវៀតណាម ដែលកំពុងវិនិយោគលើសម្បទានដីសេដ្ឋកិច្ច នៅក្នុងប្រទេសកម្ពុជាឱ្យបុគ្គលិក កម្មករជនជាតិវៀតណាមទាំងអស់ ផ្អាកការធ្វើដំណើរការឆ្លងកាត់ពីកម្ពុជា-ទៅវៀតណាម និងពីវៀតណាមមកកម្ពុជាវិញជាបណ្ដោះអាសន្ន ដើម្បីចូលរួមទប់ស្កាត់ ការរីករាលដាលជាសកលនៃជំងឺកូវីដ-១៩។

នៅក្នុងលិខិតរបស់ក្រសួងកសិកម្ម ចុះនៅថ្ងៃទី១២កក្កដានេះ បានឱ្យដឹងថា «យោងតាមអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រី នៅថ្ងៃទៅ១១កក្កដាឆ្នាំ២០២១ បានស្នើឲ្យបណ្ដាក្រុមហ៊ុនវៀតណាម ដែលកំពុងមានវត្តមានធ្វើការវិនិយោគ នៅក្នុងប្រទេសកម្ពុជា ផ្អាកការធ្វើដំណើរការឆ្លងកាត់ពីកម្ពុជា ទៅវៀតណាម និងពីវៀតណាមមកកម្ពុជាវិញជាបណ្ដោះអាសន្ន ចំពោះបុគ្គលិក កម្មករជនជាតិវៀតណាមទាំងអស់ ដើម្បីចូលរួមទប់ស្កាត់ ការរីករាលដាលជាសកលនៃជំងឺកូវីដ-១៩ នៅក្នុងប្រទេសកម្ពុជា ក៏ដូចជាពិភពលោកទាំងមូលនាពេលបច្ចុប្បន្ននេះ»។

នៅក្នុងកិច្ចប្រជុំគណៈកម្មាធិការជាតិ ប្រយុទ្ធប្រឆាំងនឹងជំងឺកូវីដ-១៩ កាលពីពេលថ្មីៗនេះ សម្ដេចតេជោក៏បានណែនាំឲ្យអាជ្ញាធរ ក៏ដូចជាសមត្ថកិច្ចនៃបណ្តាខេត្តនៅតាមព្រំដែន ជាមួយប្រទេសវៀតណាមទាំងអស់ ធ្វើការហាមឃាត់មិនឲ្យអាណិកជនជនជាតិវៀតណាមទាំងអស់ ក៏ដូចជាប្រជាពលរដ្ឋកម្ពុជាផងដែរ បើមិនមានការចាំបាច់មិនអនុញ្ញាត ឱ្យមានការឆ្លងដែនទៅមកឡើយ ដើម្បីទប់ស្កាត់ការរីករាលដាលជំងឺកូវីដ-១៩ ជាពិសេសការឆ្លងរាលដាល នៃជំងឺបំប្លែងខ្លួនថ្មីដែលតា។

យោងតាមក្រសួងសុខាភិបាលវៀតណាម គិតត្រឹមថ្ងៃអាទិត្យនេះ វៀតណាមមានករណីឆ្លងកូវីដ-១៩ សរុបនៅទូទាំងប្រទេសកើនដល់ចំនួន ២៩,៨៩២នាក់ (២៧,៨៩២នាក់ជាករណី ឆ្លងនៅក្នុងស្រុក និង ១,៩២៤នាក់ជាករណីនាំចូល)។ ក្នុងនោះស្លាប់១១៦នាក់ និងជាសះស្បើយ ៩,២៧៥នាក់៕ (ដោយ)៖ សំអឿន