អាជ្ញាធរប្រកាសស្វែងរកគ្រួសារបុរសវ័យចំណាស់ម្នាក់ដែលដួលសន្លប់លើកំណាត់ផ្លូវជាតិលេខ១

បុរសវ័យចំណាស់ម្នាក់ត្រូវបានប្រទះឃើញដួលសន្លប់ នាព្រឹកថ្ងៃទី២១ ខែវិច្ឆិកា លើកំណាត់ផ្លូវជាតិលេខ១ ហើយត្រូវបានដឹកយកទៅសង្រ្គោះនៅមន្ទីរពេទ្យបង្អែកខណ្ឌច្បារអំពៅ។

លោក អ៊ុង រ៉ូន ចៅរងទី១សង្កាត់និរោធ បាននិយាយថា បុរសដែលសន្លប់មានវ័យប្រមាណ៧០ឆ្នាំពាក់អាវឆ្នូតខៀវ ដៃវែង ស្លៀកខោខៀវ ជើងវែង សម្បុរខ្មៅស្រអែម បានមកដេកសន្លប់នៅមុខសាលាវិទ្យាល័យច្បារអំពៅ ក្នុងសង្កាត់និរោធ ខណ្ឌច្បារអំពៅ ហើយពុំមានប្រជាពលរដ្ឋណាស្គាល់គាត់ឡើយ។

លោកចៅរងបន្តថា ដោយសារតែគាត់ដួលសន្លប់ហើយដំបូងឡើងស្មានតែគាត់ស្រវឹងស្រា ប៉ុន្តែធាតុពិតគាត់ហត់ហេវរហូតដល់ដួលសន្លប់។

ជុំវិញករណីខាងលើនេះ លោក គ្រី ហ៊ុច មន្ត្រីប្រចាំការសាលាខណ្ឌច្បារអំពៅ បានឲ្យដឹងថា បុរសវ័យចំណាស់រូបនេះ ត្រូវបានរថយន្តសង្រ្គោះបន្ទាន់របស់មន្ទីរពេទ្យបង្អែកខណ្ឌច្បារអំពៅ ដឹកយកមកធ្វើការសង្រ្គោះនៅមន្ទីរពេទ្យបង្អែកខណ្ឌហើយ ។

មន្ទីរពេទ្យបានប្រកាសស្វែងរកក្រុមគ្រួសារលោកតាមកថែទាំ ចំណែកថ្លៃថ្នាំព្យាបាល គឺមន្ទីរពេទ្យមិនយកថវិកាឡើយ៕

អត្ថបទ ៖ នរា