អ្នកនាំពាក្យក្រសួងបរិស្ថាន៖ គិតត្រឹមថ្ងៃទី១៣ កក្កដា មន្ទីរបរិស្ថានបានផលិតក្តារមឈូស បានចំនួន៥១០ហើយ

អ្នកនាំពាក្យក្រសួងបរិស្ថាន បានឲ្យដឹងថា គិតត្រឹមថ្ងៃទី១៣ ខែកក្កដា ឆ្នាំ២០២១ មន្ទីរបរិស្ថានតាមបណ្ដាខេត្តមួយចំនួនដែលមានឈើស្រាប់ បានផលិតក្តារមឈូសបានចំនួន៥១០ហើយ។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងប្រាប់អ្នកសារព័ត៌មានកម្ពុជាថ្មី នាព្រឹកថ្ងៃអង្គារនេះថា ដោយអនុវត្តតាមអនុសាសន៍ណែនាំ ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានថ្លែងថា «ទោះបីជាប្រទេសយើងក្រ តែមិនត្រូវឱ្យពលរដ្ឋខ្មែរយើងស្លាប់ ដោយអណោចអធមឡើយ» ក្រសួងបរិស្ថាន បានយកឈើដែលមន្ត្រីឧទ្យានុរក្សបង្ក្រាប រឹបអូសបានពីការបង្ក្រាបបទល្មើសធនធានធម្មជាតិ ដើម្បីធ្វើក្តារមឈូសផ្តល់ជូនគណៈកម្មការជាតិប្រឆាំងនឹងជំងឺកូវីដ-១៩ ដើម្បីប្រើប្រាស់ដាក់តម្កល់សពអ្នកជំងឺកូវីដ-១៩ ដែលបានទទួលមរណភាព។

លោក នេត្រ ភក្ត្រា បានឲ្យដឹងបន្តថា ក្រសួងបរិស្ថាន នឹងយកឈើសរុបប្រមាណ១៣៤៧ម៉ែត្រគូប ដែលរឹបអូសបានមកពីការបង្ក្រាបបទល្មើសធនធានធម្មជាតិពីឆ្នាំ២០២០ និងឆ្នាំ២០២១នេះ ដើម្បីផលិតក្តារមឈូស។ លោកថា «តាមការប៉ាន់ស្មានជំហានដំបូង ឈើដែលស្ថិតក្នុងក្របខណ្ឌក្រសួងបរិស្ថាន អាចនឹងផលិតក្តារឈូសបានប្រមាណជាង១០០០មឈូស។ គិតត្រឹមថ្ងៃទី១៣ ខែកក្កដា ឆ្នាំ២០២១ មន្ទីរបរិស្ថានខេត្តចំនួន១២ ដែលមានឈើស្រាប់ បានផលិតក្តារមឈូស បានចំនួន៥១០ និងបានកំពុងបន្តការផលិតបន្ថែមទៀត»។

អ្នកនាំពាក្យក្រសួងបរិស្ថាន បានឲ្យដឹងទៀតថា ក្តារមឈូសដែលផលិតបាន ត្រូវបានប្រគល់ជូនអនុគណៈកម្មការគ្រប់គ្រងសពអ្នកជំងឺកូវីដ-១៩ ដើម្បីសម្របសម្រួល ចាត់ចែងនិងចែកចាយ ទៅដល់អនុគណៈកម្មការប្រឆាំងនឹងជំងឺកូវីដ-១៩ ថ្នាក់ខេត្តដើម្បីប្រើប្រាស់ដាក់សពអ្នកជំងឺកូវីដ-១៩ ហើយបច្ចុប្បន្ននេះ ក្តារមឈូសដែលផលិតបាន ត្រូវបានយកទៅប្រើប្រាស់ខ្លះៗហើយ។

បើតាមលោករដ្ឋលេខាធិការក្រសួងបរិស្ថាន «នេះគឺជាការយកចិត្តទុកដាក់ខ្ពស់ របស់សម្តេចតេជោនាយករដ្ឋមន្ត្រី របស់រាជរដ្ឋាភិបាល ចំពោះសុខទុក្ខប្រជាពលរដ្ឋខ្មែរ ហើយនេះគឺជាការរក្សាកិត្តិយស និងតម្លៃជាមនុស្សរបស់រាជរដ្ឋាភិបាលកម្ពុជា ចំពោះពលរដ្ឋខ្មែរ ហើយជាប្រពៃណីទំនៀមខ្មែ រក្នុងការគោរពចំពោះសព និងការជូនដំណើរជាចុងក្រោយចំពោះពលរដ្ឋអ្នកជំងឺកូវីដ-១៩ ដែលជាអកុលបានស្លាប់បាត់បង់ជីវិតក្នុងបរិបទ នៃការឆ្លងរីករាលដាលនៃជំងឺកូវីដ១៩នេះ»។ ជាមួយគ្នានេះលោក នេត្រ ភក្ត្រា បានស្រង់ប្រសាសន៍ របស់សម្ដេចតេជោនាយករដ្ឋមន្ត្រីថា »ការរៀបចំឱ្យសព មានមឈូសបានត្រឹមត្រូវ គឺជាការគោរពដល់សព»៕ (ដោយ)៖ ឃួន សុភ័ក្រ