ខេត្តកំពង់ចាម នឹងបន្តចាក់វ៉ាក់សាំងកូវីដ-១៩ ជូនពលរដ្ឋអាយុចាប់ពី១៨ឆ្នាំឡើង ឲ្យអស់ត្រឹម​ខែសីហា

(កំពង់ចាម)៖ លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ នៅព្រឹកថ្ងៃទី១៣ ខែកក្កដា ឆ្នាំ២០២១នេះ បានអញ្ជើញដឹកនាំកិច្ចប្រជុំត្រួតពិនិត្យផែនការចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាពលរដ្ឋដែលស្ម័គ្រចិត្តចាក់វ៉ាក់សាំង ដែលមានអាយុចាប់ពី ១៨ឆ្នាំឡើង និងបានចុះឈ្មោះជាមួយអាជ្ញាធរឃុំ-សង្កាត់ ក្នុងស្ទឹងត្រង់ ស្រុកចំការលើ ស្រុកស្រីសន្ធរ ស្រុកកង​មាស និងស្រុកោះសូទិន នៃខេត្តកំពង់ចាម។

ថ្លែងនៅក្នុងកិច្ចប្រជុំ លោកអភិបាលខេត្ត និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បានលើក​ឡើងថា »យើងត្រូវជំរុញការនៃចាក់វ៉ាក់សាំងកូវីដ-១៩ ជូនដល់ប្រជាពលរដ្ឋ ដែលបានស្ម័គ្រចិត្តចុះឈ្មោះសុំចាក់វ៉ាក់សាំងប្រមាណជាង៧០ម៉ឺននាក់ ក្នុងក្របខណ្ឌខេត្តកំពង់ចាម ឲ្យបានរួចរាល់១០០ភាគរយ នៅពាក់កណ្តាលខែសីហា ឆ្នាំ២០២១»។ សូមជម្រាបថា បច្ចុប្បន្ននេះនៅខេត្តកំពង់ចាម មានប្រជាពលរដ្ឋបានទទួលវ៉ាក់សាំងបង្ការជំងឺកូវីដ-១៩ បានប្រមាណជាង២៣ម៉ឺននាក់រួចមកហើយ៕ (ដោយ)៖ ហុង ម៉េងហៀ