កម្ពុជាចាប់ផ្ដើមអនុវត្ត ផែនការសកម្មភាពដើម្បីបង្ការ ទប់ស្កាត់ ការកេងប្រវ័ញ្ចផ្លូវភេទ លើកុមារតាមប្រព័ន្ធអនឡាញ

នាព្រឹកថ្ងៃទី១៤ ខែកក្កដា ឆ្នាំ២០២១ រាជរដ្ឋាភិបាលកម្ពុជា បានប្រកាសដាក់ឲ្យប្រើប្រាស់ជាផ្លូវការ «ផែនការសកម្មភាពដើម្បីបង្ការ ទប់ស្កាត់ និងឆ្លើយតប ការកេងប្រវ័ញ្ចផ្លូវភេទ លើកុមារតាមប្រព័ន្ធអនឡាញ» ដែលនឹងប្រព្រឹត្តទៅតាមកម្មវិធីអនឡាញ (ZOOM) ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

ការប្រកាសនូវផែនការសកម្មភាពនេះ ត្រូវបានចាត់ទុកថា ជាព្រឹត្តការណ៍ដ៏សំខាន់ និងជាប្រវត្តិសាស្ត្រមួយនឹងកើតឡើង ស្របពេលដែលរាជរដ្ឋាភិបាលកម្ពុជា កំពុងតែប្រយុទ្ធប្រឆាំង ជាមួយសត្រូវគ្មានស្រមោលកូវីដ-១៩ និងស្របតាមបរិបទសកលនៃការឆ្លើយតប ក្នុងប្រព័ន្ធការពារកុមារថ្នាក់ជាតិ។ 

កម្មវិធីនេះ ត្រូវបានរៀបចំដោយអគ្គលេខាធិការដ្ឋាន នៃក្រុមប្រឹក្សាជាតិកម្ពុជាដើម្បីកុមារ ក្រសួងសង្គមកិច្ច អតីតយុទ្ធជន និងយុវនីតិសម្បទា ដោយសហការជាមួយគណៈកម្មាធិការជាតិ គ.ជ.ប.ជ និងក្រសួងមហាផ្ទៃ​ក្រោមការឧបត្ថម្ភថវិកាពី៖ អង្គការ Terre des Homme Netherlands អង្គការភ្លែនអន្តរជាតិ អង្គការ ChildFund អង្គការ UNICEF អង្គការ APLE អង្គការ CPU និងអង្គការចាប់ដៃ។

បើតាមអគ្គលេខាធិការដ្ឋាន នៃក្រុមប្រឹក្សាជាតិកម្ពុជាដើម្បីកុមារ បានឲ្យដឹងថា នៅកម្ពុជា តាមរយៈការរាយការណ៍ពីសាធារណៈជនមកកាន់សមត្ថកិច្ច និងបណ្តាញរាយការណ៍តាមអ៊ីនធើណិត (Internet Hotline) ជាមធ្យម មានចំនួនរាយការណ៍ជាង ១៥០ករណី ក្នុងមួយឆ្នាំៗ ដែលជាករណីសង្ស័យ ទាក់ទងនឹងការលួងលោមកុមារតាមអនឡាញ ការផលិត និងចែកចាយរូបភាពសម្ភារៈអាសអាភាសកុមារ និងការគំរាមខាងផ្លូវភេទជាដើម។ ដើម្បីឆ្លើយតបនឹងបញ្ហានេះកម្ពុជាបានកំពុងយកចិត្តទុកដាក់ និងរួមកម្លាំងគ្នា ដើម្បីបង្ការ ទប់ស្កាត់ និងឆ្លើយតបប្រកបដោយប្រសិទ្ធភាព៕ (ដោយ)៖ ឃួន សុភ័ក្រ