ពន្ធនាគារថ្មីនៅកំពង់ឆ្នាំង ដាក់អ្នកទោសបានជាង ២ពាន់នាក់ សាងសង់សម្រេចបានជាង៩០ ភាគរយ

ពន្ធនាគារថ្មី ស្ថិតក្នុងភូមិត្រពាំងតាសុក ឃុំព្រៃមូល ស្រុករលាប្អៀរ ខេត្តកំពង់ឆ្នាំង សាងសង់សម្រេចបាន៩០ភាគរយហើយ។

លោក ម៉ុន វត្ថា នាយកទីចាត់ការហិរញ្ញវត្ថុរដ្ឋបាលខេត្តកំពង់ឆ្នាំង បានឱ្យដឹងថា ពន្ធនាគារថ្មីនេះសាងសង់នៅលើដីចំនួន ១០ហិកតា អាចផ្ទុកអ្នកទោសបានប្រមាណជាង ២ ពាន់នាក់ មានចម្ងាយជាង១៥គីឡូម៉ែត្រពីទីរួមខេត្ត។

លោក ម៉ុន វត្ថា បានបន្តថា ដោយសារពន្ធនាគារបច្ចប្បន្នដែលមានទីតាំងនៅក្នុងក្រុងកំពង់ឆ្នាំងមានលក្ខណៈតូចចង្អៀត ប៉ះពាល់ដល់សុខមាលភាពដល់អ្នកជាប់ឃុំជាពិសេស ប៉ះដល់សោភ័ណ្ឌភាពក្រុងកំពង់ឆ្នាំង ទើបរដ្ឋបាលខេត្តសម្រេចជ្រើសរើសទីតាំងថ្មីសាងសង់ពន្ធនាគារថ្មីតែម្តង។

គួរបញ្ជាក់ថា ពន្ធនាគារថ្មីនេះ បានប្រារព្ធពិធីក្រុងពាលី បញ្ចុះបឋមសិលាសាងសង់ កាលពីថ្ងៃទី៣០ ខែមេសា ឆ្នាំ​២០២០។

ក្រៅពីសាងសង់ពន្ធនាគារថ្មីនេះរដ្ឋបាលខេត្តកំពង់ឆ្នាំង ក៏គ្រោងសាងសង់មជ្ឈមណ្ឌលអប់រំនិងបន្សាបគ្រឿងញៀននៅលើផ្ទៃដី៥ហិកតាទៀតនៅក្បែរនោះផងដែរ៕ អត្ថបទ៖ ពុធិកា