ប្រទះឃើញសាកសពស្ត្រីម្នាក់​ អណ្ដែតទឹកស្ទឹងសង្កែបង្កការភ្ញាក់ផ្អើល

ប្រជាពលរដ្ឋអ្នកដើរហាត់ប្រាណនាំគ្នាភ្ញាក់ផ្អើលទាំងព្រឹកខណ:ដែលបានប្រទះឃើញសាកសពស្ត្រីម្នាក់បានអណ្តែតទឹកក្នុងដងស្ទឹងសង្កែដោយគេដាក់ហេតុការណ៍នេះថាសង្ស័យស្ត្រីរងគ្រោះស្រវឹងស្រាហើយចុះហែលទឹកលេងបណ្តាល​ឱ្យលង់ស្លាប់តែម្តង។

ហេតុការណ៍ឃើញសពស្ត្រីលង់ទឹកស្លាប់នេះបានបង្កការភ្ញាក់ផ្អើលនៅព្រឹកថ្ងៃទី១៤ខែកក្កដាឆ្នាំ២០២១នៅត្រង់ចំណុចវេទិកាអុំទូក កណ្តាលក្រុងបាត់ដំបង។

បើយោងតាមសម្តីពីប្រភពច្រើននាក់ដែលធ្លាប់ស្គាល់ស្ត្រីរងគ្រោះបានឲ្យដឹងប្រហាក់ប្រហែលគ្នាថាជនរងគ្រោះឧស្សា​ហ៍​ស្រវឹងស្រាជាញឹកញាប់ពេលស្រវឹងស្រាម្តងៗតែងតែរករឿងឈ្លោះនឹងប្តីហើយ២ខែចុងក្រោយដោយសារប្តីស៊ូទ្រាំនឹងការរករឿងពីប្រពន្ធមិនបានក៏បែកផ្លូវគ្នារហូតដល់ថ្ងៃកើតហេតុតែម្តង។

សាកសពស្ត្រីរងគ្រោះឋិតក្នុងសភាពអាក្រាតអត់ខោត្រូវបានគេស្គាល់មានឈ្មោះ(ដា)អាយុប្រហែលជិត៤០ឆ្នាំ រស់នៅក្នុងរ៉ាជង្រុក ភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាតដំបង។

ប្រភពពីប្រជាពលរដ្ឋដែលបានឃើញហេតុការណ៍បានបញ្ជាក់ឲ្យដឹងដែរថា÷កាលពីល្ងាចថ្ងៃទី១៣ខែកក្កដាកន្លងមកគេបានឃើញជនរងគ្រោះចុះងូតទឹកស្ទឹងនិងបោកខោអាវនៅក្បែរគល់ស្ពានសម្តេចក្រឡាហោមលុះបោកខោអាវរួចសង្ស័យ​ស្រវឹងស្រាផងស្ត្រីខាងលើបានហែលទឹកលេងលុះដល់កណ្តាលស្ទឹងក៏អស់កម្លាំងស្រែកឲ្យគេឯងជួយរួចបានលិចទៅក្នុងទឹកបាត់តែម្តងរហូតព្រឹកឡើងទើបអ្នកហាត់ប្រាណប្រទះឃើញសាសពអណ្តែតក៏ឆោឡោឡើងតែម្តង។

ភ្លាមៗសមត្ថកិច្ចជំនាញបានចុះទៅពិនិត្យរួចសម្រេចដឹកសាកសពយកទៅតម្កល់ទុកនៅឯវត្តបច្ឆាដើម្បីស្វែងរកសាច់ញាតិយកទៅធ្វើបុណ្យតាមប្រពៃណី៕ អត្ថបទ៖ សៅ សារិទ្ធ