ព័ត៌មានជាតិ

ឆមាសទី ១ ឆ្នាំ ២០២១ តំបន់សេដ្ឋកិច្ចពិសេសខេត្តព្រះសីហនុសម្រេចការនាំចេញនាំចូលកើនជិត ១ ពាន់លានដុល្លារ

បានផុស

៣ years មុន

នៅ

ថ្ងៃពុធ ១៤ កក្កដា ២០២១

ដោយ

ភ្នំពេញ៖ ក្នុងរយៈពេលមួយឆមាសទី១ឆ្នាំ២០២១ សហគ្រាសក្នុងតំបន់សេដ្ឋកិច្ចពិសេសក្រុងព្រះសីហនុ សម្រេចបានការនាំចេញនាំចូលក្នុងតម្លៃ៩៩៤លានដុល្លារដែលតម្លៃនេះ កើនឡើងជិត ៥០ ភាគរយបើធៀបទៅនឹងឆមាសទី១ ឆ្នាំ ២០២០ មានតម្លៃ ៦៦៣ លានដុល្លារអាមេរិក ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងនៅថ្ងៃទី ១៤ ខែកក្កដា នេះថា ការកើនឡើងនៃទំហំពាណិជ្ជកម្មក្នុងតំបន់សេដ្ឋកិច្ចពិសេសខេត្តព្រះសីហនុ គឺជាការជំរុញកំណើនប៉ូលសេដ្ឋកិច្ចរបស់រាជរដ្ឋាភិបាលកម្ពុជា ដើម្បីទាញយកការវិនិយោគបន្ថែមទៀតមកកាន់តំបន់នេះ។ កំណើននៃតំបន់សេដ្ឋកិច្ចពិសេសនិងកិច្ចព្រមព្រៀងមួយចំនួនដែលកម្ពុជាមានស្រាប់ គឺជាចំណុចមួយដ៏ល្អសំរាប់ជំរុញកំណើនសេដ្ឋកិច្ចកម្ពុជាឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧកញ៉ា លឹម ហេង បានលើកឡើងថា៖ «ខេត្តព្រះសីហនុគឺជាប៉ូលសេដ្ឋកិច្ចពិសេសគឺជាគោលដៅច្រកចេញចូលរបស់កម្ពុជានៅពេលអនាគតដែលយើង ត្រូវតែអភិវឌ្ឍន៍ទីក្រុងមួយនេះឲ្យទំនើបជាងទីក្រុងភ្នំពេញទៅទៀតព្រោះទីនេះគឺជាចំណុចទាក់ទាញវិនិយោគមកកាន់កម្ពុជា»។

លោក លឹម ហេងបន្តថា នៅពេលដែលតំបន់សេដ្ឋកិច្ចពិសេសបានកើតមានច្រើននេះជាចំណុចមួយដ៏ល្អណាស់ខណៈដែលកម្ពុជាមានកិច្ចព្រមព្រៀងពាណិជ្ជ កម្មសេរីជាមួយចិន ហើយយើងនឹងមានកិច្ចព្រមព្រៀងពាណិជ្ជកម្មសេរីជាមួយនឹងកូរ៉េខាងត្បូង និង កិច្ចព្រមព្រៀងពាណិជ្ជកម្មសេរីសហភាពសេដ្ឋកិច្ចអឺរ៉ាស៊ា (EAEU)  បូករួមជាមួយការអនុគ្រោះពន្ធការនាំចេញរបស់កម្ពុជាពីសហរដ្ឋអាមេរិក ចក្រភពអង់គ្លេស និង អ៊ីប៊ីអេ របស់សហគមន៍អឺរ៉ុបផងនោះ វាជាសញ្ញាល្អ មួយសម្រាប់ជំរុញកំណើនសេដ្ឋកិច្ច ហើយយើងសង្ឃឹមថាខេត្តព្រះសីហនុនឹងចាប់ផ្ដើមរីកចម្រើនហើយនៅពេលដែលខេត្តមួយនេះរីកចំរើនវានឹងរីកសាយភាយ ទៅកាន់បណ្តាខេត្តផ្សេងៗទៀត ។

រាជរដ្ឋាភិបាលកម្ពុជាកាលពីថ្ងៃទី ៩ មិថុនា បានចុះហត្ថលេខាលើអនុក្រឹត្យលេខ៨២ អនក្រ.បក ស្តីពីការរៀបចំនិងការប្រព្រឹត្តទៅរបស់គណៈកម្មាធិការបច្ចេកទេសអន្តរក្រសួងរៀបចំគោលនយោបាយគ្រប់គ្រងនិងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង(គ.ប.ដ.)។

គណៈកម្មាធិការបច្ចេកទេសអន្តរក្រសួងនេះ មានតួនាទីនិងភារកិច្ចដូចជាដឹកនាំនិងសម្របសម្រួលអន្តរក្រសួងស្ថាប័នក្នុងការរៀបចំគោលនយោបាយគ្រប់គ្រង និងប្រើប្រាស់ដីធ្លីដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង,ផ្តល់ការណែនាំជាយុទ្ធសាស្ត្រនិងបច្ចេកទេសក្នុងការរៀបចំគោលន យោបាយគ្រប់គ្រងនិងប្រើប្រាស់ដីធ្លីដើម្បីអភិវឌ្ឍខេត្តព្រះសីហនុ, តាមដាននិងត្រួតពិនិត្យវឌ្ឍនភាពនៃការរៀបចំគោលនយោបាយ, រៀបចំរបាយការណ៍ពីវឌ្ឍន ភាពនៃការរៀបចំគោលនយោបាយគ្រប់គ្រងនិងប្រើប្រាស់ដីធ្លីជូនក្រុមប្រឹក្សារៀបចំផែនការមេនិងធ្វើកិច្ចសហប្រតិបត្តិការបច្ចេកទេស និង ហិរញ្ញវត្ថុជាមួយដៃគូអភិវឌ្ឍន៍ជាតិ និងអន្តរជាតិ។

លោក លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុបានប្រាប់កម្ពុជាថ្មីកាលពីខែមេសាថាកំពង់ផែក្រុងព្រះសីហនុ កំពុងត្រៀមចាប់ផ្តើមសង់កំពង់ផែកុងតឺន័រថ្មី១ទៀតនៅដើមឆ្នាំ២០២២ ខាងមុខដោយគ្រោងបញ្ចប់នៅចុងឆ្នាំ ២០២៤។ ការអភិវឌ្ឍកំពង់ផែក្រុងព្រះសីហនុឱ្យមានទំហំធំនិងជម្រៅទឹកកាន់តែជ្រៅ នឹងជួយឱ្យកម្ពុជាមានសមត្ថភាពទទួលបានការចូលចតរបស់នាវាលំដាប់អន្តរជាតិដោយផ្ទាល់កាន់តែច្រើន ខណៈបច្ចុប្បន្នការដឹកទំនិញធំៗតាមផ្លូវទឹក កម្ពុជាត្រូវពឹងផ្អែកលើកំពង់ផែប្រទេសក្នុងតំបន់។ លោកបន្តថានៅពេលកម្ពុជាមានផែទឹកជ្រៅ នឹងមាននាវាធំៗចូលចតកាន់តែច្រើនដែលវានឹងជួយធ្វើឱ្យថ្លៃដឹកជញ្ជូនទំនិញតាមសមុទ្រចុះថ្លៃ និងចំណាយពេលតិចព្រមទាំងចូលរួមបង្កើនភាពប្រកួតប្រជែងសម្រាប់កម្ពុជាផងដែរ៕ 

អត្ថបទ៖ណារី

Related Topics:តំបន់សេដ្ឋកិច្ចពិសេស ខេត្តព្រះសីហនុ