ព័ត៌មានជាតិ

ត្រឹមរយៈពេលបីថ្ងៃ ខេត្តត្បូងឃ្មុំ ចាក់វ៉ាក់សាំងជំងឺកូវីដ ជូនពលរដ្ឋនៅតំបន់ហានិភ័យ បានជិត២ម៉ឺននាក់

បានផុស

៤ years មុន

នៅ

ថ្ងៃព្រហស្បតិ៍ ១៥ កក្កដា ២០២១

ដោយ

ក្រោយពីបិទបញ្ចប់ការចាក់វ៉ាក់សាំងបង្ការជំងឺកូវីដ១៩ នៅមូលដ្ឋានក្រុងសួង សម្រាប់ដូសទី១មក អាជ្ញាធរខេត្តត្បូងឃ្មុំបានបន្តចុះផ្តល់វ៉ាក់សាំង នៅតំបន់ហានិភ័យចំនួនបីស្រុកទៀត ក្នុងមានស្រុកតំបែរ ស្រុកក្រូចឆ្មារ និងស្រុកមេមត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានឲ្យដឹងថា តាមផែនការរបស់មន្ទីរសុខាភិបាល ក៏ដូចរដ្ឋបាលខេត្តត្បូងឃ្មុំបានបន្ត ចុះផ្តល់វ៉ាក់សាំងបង្ការជំងឺកូវីដ១៩ នៅស្រុកគោលដៅចំនួនបីទៀត ដែលកំពុងប្រឈមហានិភ័យខ្លាំង និងរកឃើញអ្នកវិជ្ជមានកូវីដ១៩ជាបន្តបន្ទាប់ផងដែរ។ លោកប្រធានមន្ទីរ បានបន្ថែមទៀតថា ក្រោយបានបិទបញ្ចប់ការផ្តល់វ៉ាក់សាំងដូសទី១ សម្រាប់ពលរដ្ឋនៅក្រុងសួងរួចមក រដ្ឋបាលសាលាខេត្តត្បូងឃ្មុំ បានចាប់ផ្តើមពីថ្ងៃទី១២ ខែកក្តដានេះ ដើម្បីបន្តចាក់វ៉ាក់សាំង ជូនប្រជាពលរដ្ឋនៅបណ្តាស្រុកបីទៀត ក្នុងនោះរួមមាន ស្រុកតំបែរ ស្រុកក្រូចឆ្មារ និងស្រុកមេមត់ ដោយបែងចែកចេញ៩ទីតាំងសម្រាប់ ក្រុមគ្រូពេទ្យធ្វើសកម្មភាពចាក់វ៉ាក់សាំងបង្ការជំងឺកូវីដ១៩នេះ ជូនពលរដ្ឋចាប់ពីអាយុ១៨ឆ្នាំឡើងទៅ។

សូមជម្រាបជូនថា ក្នុងភូមិសាស្ត្រខេត្តត្បូងឃ្មុំ នៅតែបន្តរកឃើញអ្នកវិជ្ជមានកូវីដ១៩ជាបន្តបន្ទាប់ ពុំអន់ថយឡើយ ដោយគិតត្រឹមថ្ងៃទី១៤ ខែកក្តដានេះ រកឃើញករណីអ្នកវិជ្ជមានកូវីដ១៩ ចំនួន១៤៦៩នាក់ ក្នុងនោះដែរ មានអ្នកជំងឺជាសះស្បើយ ចំនួន៧៧៧នាក់ អ្នកជំងឺកំពុងសម្រាកព្យាបាលចំនួន៦៦៨នាក់ និងមានករណីស្លាប់ដោយសារជំងឺកូវីដ១៩ចំនួន២០នាក់។ ដោយឡែក រយៈពេល២ថ្ងៃកន្លងទៅនេះ ក្នុងយុទ្ធនាការចាក់វ៉ាក់សាំងបង្ការជំងឺកូវីដ១៩ ក្នុងស្រុកចំនួនបីនេះ មានប្រជាពលរដ្ឋដែលស្ម័គ្រចិត្ត ទៅទទូលវ៉ាក់សាំងពីរាជរដ្ឋាភិបាល ដោយឥតគិតថ្លៃ មានចំនួនប្រមាណ១៦៨០០នាក់៕