ព័ត៌មានជាតិ

ថ្នាក់ដឹកនាំ និងមន្ត្រីរាជការចេញ ចូលបំពេញការងារនៅក្រសួងទេសចរណ៍ ត្រូវធ្វើតេស្តរហ័សរកកូវីដ-១៩

បានផុស

៤ years មុន

នៅ

ថ្ងៃព្រហស្បតិ៍ ១៥ កក្កដា ២០២១

ដោយ

ចាប់ពីថ្ងៃទី១៩ ខែកក្កដា ឆ្នាំ២០២១ តទៅ ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាដែលចេញចូលបំពេញការងារនៅក្រសួងទេសចរណ៍ ត្រូវធ្វើតេស្តរហ័សដើម្បីទប់ស្កាត់ការឆ្លងរាលដាលជំងឺកូវីដ១៩។

យោងតាមសេចក្តីជូនដំណឹងរបស់ក្រសួងទេសចរណ៍ ចុះថ្ងៃទី១៥ ខែកក្កដា នេះ បានឱ្យដឹងថា អនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការចូលរួមទប់ស្កាត់ការរីករាលដាលនៃជំងឺកូវីដ-១៩ ក្នុងបរិបទនៃព្រឹត្តិការណ៍សហគមន៍២០កុម្ភៈ ក្រសួងទេសចរណ៍នឹងអនុវត្តការធ្វើតេស្តរហ័សរកកូវីដ១៩ ចាប់ពីថ្ងៃទី១៩ ខែកក្កដា ឆ្នាំ២០២១តទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបានណែនាំថា មុននឹងចូលបំពេញការងារនៅតាមអង្គភាព ថ្នាក់ដឹកនាំមន្ត្រីរាជការ និងមន្ត្រីជាប់កិច្ចសន្យា ត្រូវធ្វើតេស្តរហ័សរកមេរោគកូវីដ១៩ នៅច្រកចូលអគារទាំងពីរ នៃទីស្តីការក្រសួង។ ករណីមានការប៉ះពាល់ដោយផ្ទាល់ ឬដោយប្រយោល និងអ្នកជំងឺកូវីដ១៩ ដែលមានរោគសញ្ញាជំងឺកូវីដ១៩ ដូចជាផ្ដាសាយ ក្អក ហៀរសំបោរ ឈឺបំពង់ក ថប់ដង្ហើម ឬរោគសញ្ញាសង្ស័យផ្សេងទៀត ត្រូវធ្វើតេស្តម្ដងទៀតយ៉ាងយូររយៈពេល៤៨ម៉ោង បន្ទាប់ពីការធ្វើតេស្តលើកទីមួយ។

ចំពោះការធ្វើតេស្តរកមេរោគកូវីដ១៩ ដោយខ្លួនឯង ហើយបានរកឃើញវិជ្ជមានកូវីដ១៩ ត្រូវទំនាក់ទំនងទៅខ្សែទូរសព្ទលេខ១១៥ ឬលេខ១២២២ សម្រាប់ភូមិសាស្ត្ររាជធានីភ្នំពេញ៕

អត្ថបទ ៖ សំអឿន