ព័ត៌មានជាតិ

អ្នកនាំពាក្យ៖ដំណើរការបើកសាលារៀនឡើងវិញ នាព្រឹកនេះប្រព្រឹត្តិទៅដោយរលូន

បានផុស

៤ years មុន

នៅ

ថ្ងៃចន្ទ ២៣ វិច្ឆិកា ២០២០

ដោយ

លោក រស់ សុវាចា អ្នកនាំពាក្យក្រសួងអប់រំយុវជននិងកីឡា បានមានប្រសាសន៍នៅព្រឹកថ្ងៃទី២៣ ខែវិច្ឆិកានេះថា ដំណើរការបើកសាលារៀនឡើងវិញ នៅរាជធានីភ្នំពេញ និងទីរួមខេត្តកណ្តាល នាព្រឹកនេះ បានប្រព្រឹត្តិទៅដោយភាពរលូន ដោយអនុវត្តនូវវិធានការសុវត្ថិភាពសុខភាពតាមគោលការណ៍ប្រតិបត្តិស្តង់ដាររបស់ក្រសួង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានលើកឡើងថា«ជាទូទៅការបើកដំណើរការសាលារៀននៅព្រឹកនេះ គឺមានភាពរលូនតាមការគ្រោងទុក ដោយមានការអនុវត្តយ៉ាងខ្ជាប់ខ្ជួននូវវិធានការសុវត្ថិភាពសុខភាពតាមគោលការណ៍ប្រតិបត្តិស្តង់ដាររបស់ក្រសួងអប់រំ យុវជន និងកីឡា ចុះថ្ងៃ០៤ សីហា ២០២០»។

លោកបានអំពាវនាវដល់បុគ្គលិកអប់រំ គណៈគ្រប់គ្រងគ្រឹះស្ថានសិក្សាសាធារណៈនិងឯកជន លោកគ្រូ អ្នកគ្រូ សិស្សានុសិស្ស និងគ្រប់ភាគីពាក់ព័ន្ធ សូមបន្តអនុវត្តគោលការណ៍ប្រតិបត្តិស្ដង់ដាររបស់ក្រសួងអប់រំ យុវជន និងកីឡាចុះថ្ងៃទី០៤ ខែសីហា ឆ្នាំ២០២០ និងតាមការណែនាំរបស់ក្រសួងសុខាភិបាលឱ្យមានប្រសិទ្ធភាពខ្ពស់បំផុត។

គួរបញ្ជាក់ថា ក្រសួងអប់រំយុវជននិងកីឡាបានផ្អាកដំណើការការសិក្សាគ្រឹះស្ថានសិក្សារដ្ឋនិងឯកជននៅរាជធានីភ្នំពេញ និងទីរួមខេត្តកណ្តាល រយៈពេល២សប្តាហ៍ ចាប់ពីថ្ងៃទី៨ ខែវិច្ឆិកា ឆ្នាំ២០២០ ដោយសារព្រឹត្តិការណ៍ថ្ងៃទី០៣វិច្ឆិកា។

បន្ទាប់ពីព្រឹត្តិការណ៍ថ្ងៃទី០៣វិច្ឆិកា បានបិទបញ្ចប់ រាជរដ្ឋាភិបាល បានអនុញ្ញាតឲ្យគ្រឹះស្ថានទាំងនោះរួមទាំងគ្រឹះស្ថានសិក្សាអប់រំបច្ចេកទេសនិងបណ្ដុះបណ្ដាលវិជ្ជាជីវៈ បើកដំណើរការឡើងវិញ នៅព្រឹកថ្ងៃទី២៣ ខែវិច្ឆិកានេះ៕

អត្ថបទ ៖ សំអឿន