អាជ្ញាធរជាតិនឹងដុតបំផ្លាញគ្រឿងញៀន និងសារធាតុគីមីផ្សំជាង៧តោន នៅព្រឹកស្អែក

ភ្នំពេញ៖ អាជ្ញាធរជាតិប្រយុទ្ធប្រឆាំងគ្រឿងញៀននឹងធ្វើការដុតបំផ្លាញចោលគ្រឿងញៀន និងសារធាតុគីមីផ្សំជាង៧តោន នៅព្រឹកថ្ងៃទី១៩ ខែកក្កដា ឆ្នាំ២០២១ ស្អែកនេះនៅទីតាំងផ្លូវ៦០ម៉ែត្រ។

បើតាមលោក ឧត្តមសេនីយ៍ឯក ឈឹមសិទ្ធិ បុណ្យរឹទ្ធ ដែលជាអ្នកធ្វើរបាយការណ៍បានឱ្យដឹងថា គ្រឿងញៀន សារធាតុគីមីផ្សំ និងសារធាតុពាក់ព័ន្ធផ្សេងទៀតដែលត្រូវបំផ្លាញសរុបចំនួន ៧តោន៥៥១គីឡូក្រាម៥០៦.៩៩ក្រាម ត្រូវបានសាលាដំបូងរាជធានីភ្នំពេញរឹបអូសបាននាពេលកន្លងមក។ ក្នុងនោះរួមមានសារធាតុអេរ៉ូអ៊ីនចំនួន២៩១គីឡូក្រាម៩២៣.១ក្រាម ថ្នាំក្រវីចំនួន៥គីឡូក្រាម៨០៦.៥៥ក្រាម កញ្ឆាចំនួន៨គីឡូក្រាម០៧៩.០២ក្រាម កាទីណូន ១០គីឡូក្រាម១៨៩.១២ក្រាម ថ្នាំមេតីហ្វេតាមីន ៦០២គីឡូក្រាម៨០៦.៥៥ក្រាម នីមេតាហ្សេប៉ាម ១៣គីឡូក្រាម៨២៨.៥៩ក្រាម និងសារធាតុគីមីផ្សំចំនួន២តោន៥០០គីឡូក្រាម៨០០.៨ក្រាម។

លោកឧត្តមសេនីយ៍ឯក បានបន្តថា ដោយសារមានសារធាតុគីមីផ្សំនឹងសារធាតុគីមីប្រភេទខ្លះដែលមានលក្ខណៈគីមីអាចឆាបឆេះខ្លាំង និងពុលមិនអាចធ្វើការបំផ្លាញដោយវិធីសាស្ត្រដុតបាន ព្រោះពាក់ព័ន្ធនឹងបញ្ហាសុវត្ថិភាព និងបរិស្ថានក្រុមការងារបច្ចេកទេសបានធ្វើការបែងចែកការបំផ្លាញជា២វគ្គដាច់ដោយឡែកពីគ្នា គឺការបំផ្លាញដោយពិធីដុត និងការបំផ្លាញដោយវិធីបន្សាប។

លោក ឧត្តមសេនីយ៍ឯក បានបញ្ជាក់ថា ចំពោះសារធាតុដែលត្រូវធ្វើការបន្សាប ក្រុមការងារបច្ចេកទេសនឹងធ្វើការសិក្សាលម្អិតហើយលើកគម្រោងចំណាយស្នើទៅរាជរដ្ឋាភិបាលនៅពេលក្រោយ៕

អត្ថបទ៖ សំអឿន