ព្រឹកនេះកម្ពុជាដឹកជញ្ជូនសម្ភារៈប្រឆាំងជំងឺកូវីដ-១៩ តាមយន្ត ហោះទៅជូនដល់រដ្ឋាភិបាល វៀតណាម

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងជាតំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី១៩ ខែកក្កដា ឆ្នាំ២០២១នេះ បាននាំយកអំណោយ របស់រាជរដ្ឋាភិបាលកម្ពុជា យកទៅផ្តល់ជូនរដ្ឋាភិបាល និងប្រជាជនវៀតណាម ដើម្បីចូលរួមទប់ស្កាត់ការរីករាលដាលជំងឺកូវីដ-១៩ ដែលកំពុងវាយលុកយ៉ាងខ្លាំង។

សូមបញ្ជាក់ថា កាលពីថ្ងៃទី១៧ ខែកក្កដា សម្តេចតេជោ ហ៊ុន សែន បានសម្រេចឧបត្ថម្ភថវិកា២០ម៉ឺនដុល្លារ និងម៉ាសចំនួន១លាន ១សែនម៉ាស និងម៉ាស៊ីនផលិតអុកស៊ីសែនស្វ័យប្រវត្តិ ចំនួន១០០គ្រឿង ជូនទៅរដ្ឋាភិបាលវៀតណាម ដើម្បីរួមចំណែកដោះស្រាយ ការលំបាករបស់វៀតណាម ដែលកំពុងរងការរាតត្បាតដោយជំងឺកូវីដ-១៩។

ទន្ទឹមគ្នានេះ សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ក៏បានប្រកាសជួយឧបត្ថម្ភថវិកាចំនួន១០ ម៉ឺនដុល្លារអាមេរិក ជូនកាកបាទក្រហមប្រទេសវៀតណាម និងសមាគមមិត្តភាពកម្ពុជា-វៀតណាម បានផ្តល់ថវិកាចំនួន៥ ម៉ឺនដុល្លាសហរដ្ឋអាមេរិចផងដែរ។

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានគូសបញ្ជាក់ថា ការផ្តល់ជំនួយថវិកា និងម៉ាសនេះ គឺជាការបង្ហាញនូវស្មារតីរួមសហការគ្នា និងរួមសុខរួមទុក្ខក្នុងនាមប្រទេសជាមិត្ត ដើម្បីចូលរួមក្នុងការប្រយុទ្ធប្រឆាំងនឹងជំងឺកូវីដ-១៩។

គួររំលឹកថា ប្រទេសវៀតណាម គឺជាប្រទេសទី៥ ហើយដែលរាជរដ្ឋាភិបាលកម្ពុជា បានចូលរួមផ្ដល់ថវិកា ក៏ដូចជាសម្ភារៈ ដើម្បីចូលរួមប្រយុទ្ធប្រឆាំងជំងឺកូវីដ-១៩ ដែលកន្លងមកកម្ពុជាធ្លាប់បាន ផ្តល់ដល់ប្រទេសឡាវ, មីយ៉ាន់ម៉ា, ទីម័រ និងនេប៉ាល់៕ (ដោយ)៖ កោះកែវ