អំណោយរបស់រាជរដ្ឋាភិបាលកម្ពុជាបានប្រគល់ជូនប្រទេស​វៀតណាមព្រឹកនេះ

រាជរដ្ឋាភិបាលកម្ពុជា នៅថ្ងៃទី ១៩ ខែកក្កដា ឆ្នាំ ២០២១ នេះ បានផ្តល់អំណោយម៉ាសធម្មតា ១ លាន ម៉ាស N95 ចំនួន ១០ និងម៉ាស៊ីនផលិតអុកស៊ីសែន១០០គ្រឿង ព្រមទាំងថវិការរបស់រាជរដ្ឋាភិបាលកម្ពុជា ២០ ម៉ឺនដុល្លារ ថវិការសប្បុរសធម៌​របស់​កាកបាទក្រហម ១០ ម៉ឺនដុល្លារ ទៅឱ្យប្រទេសវៀតណាម ដើម្បីចូល​រួមទប់​ស្កាត់​ក្នុង​ការ​ឆ្លង​រីក​រាលដាល នៃជំងឺកូវីដ១៩។

អំណោយ សម្ភារបរិក្ខាបានដឹកដល់ទីក្រុងហូជីមិញ ប្រទេសវៀតណាម នៅម៉ោង ៩ ព្រឹកនេះ ក្រោមពិធីប្រគល់ និងទទួល របស់លោក ជំទាវ យក់ សម្បត្តិ រដ្ឋលេខាធិការក្រសួងសុខាភិបាល និងលោក យឿង អាញ់ឌឹក អនុប្រធានគណៈកម្មការ​ប្រជាជនវៀតណាម។

លោក ជំទាវ យក់ សម្បត្តិបានថ្លែងក្នុងពិធីប្រគល់ និងទទួលថា “ការប្រគល់អំណោយរបស់រាជរដ្ឋាភិបាលកម្ពុជា នៅពេលនេះ គឺបង្ហាញពីសាមគ្គីភាព និងមិត្តភាពរវាងប្រទេសកម្ពុជា និងវៀតណាម ក្នុងពេលដែលការរីករាលដាលនៃជំងឺកូវីដ១៩ កំពុងវាយប្រហារទីក្រុងហូជីមិញ ប្រទេសវៀតណាម”។

សម្ដេចតេជោ ហ៊ុន សែន មានប្រសាសន៍ថាកាលពីពេលថ្មីៗនេះថា ការឧបត្ថម្ភ ថវិកា និងសម្ភារម៉ាស និងម៉ាស៊ីនផលិតអុកស៊ីសែន១០០គ្រឿង ជូនទៅរដ្ឋាភិបាលវៀតណាម ដើម្បីរួមចំណែកដោះស្រាយការលំបាករបស់វៀតណាម ដែល​កំពុងរងការរាតត្បាតដោយ​ជំងឺកូវីដ១៩។

សម្តេចតេជោ ហ៊ុន សែន បញ្ជាក់ថា ការផ្តល់ជំនួយថវិកា និងម៉ាស់នេះ បង្ហាញនូវស្មារតីរួមសហការគ្នាក្នុងនាមប្រទេសជាមិត្ត ដើម្បីចូលរួមក្នុងការប្រយុទ្ធប្រឆាំងនឹងជំងឺកូវីដ១៩។

នៅទីក្រុងហូជីមិញប្រទេសវៀតណាម កំពុងរងការរីករាលដាលនៃការឆ្លង និងស្លាប់ហក់ឡើងខ្លាំង នៅប៉ុន្មានថ្ងៃនេះ។ មានអ្នកឆ្លងសរុបកើនដល់ ជិត ៥ ម៉ឺនករណី និងអ្នកស្លាប់ ជាង ២០០ នាក់៕ ដោយៈ ឡេង ដេត