រយៈពេល៦ខែនេះមានព្រះសង្ឃ២៣៩អង្គ​បានឆ្លងជំងឺ កូវីដ១៩ភាគច្រើននៅភ្នំពេញ

នៅក្នុងរយៈពេល៦ខែឆ្នាំ២០២១នេះមានព្រះសង្ឃព្រះពុទ្ធសាសនាឆ្លងជំងឺកូវីដ-១៩ នៅទូទាំងប្រទេសសរុប២៣៩អង្គដែលភាគច្រើននៅរាជធានីភ្នំពេញ។

លោក សេង សុមុនី អ្នកនាំពាក្យក្រសួងធម្មការនិងសាសនាបានមានប្រសាសន៍នៅថ្ងៃទី១៩កក្កដានេះថា ក្នុងចំណោមព្រះសង្ឃឆ្លងកូវីដ ចំនួន២៣៩អង្គក្នុងនោះមានព្រះសង្ឃចំនួន ១៧១ អង្គកំពុងព្យាបាលនៅតាមមន្ទីរពេទ្យ ជាសះស្បើ​យ​ចំនួន៦៦អង្គ និងសុគតចំនួន២អង្គ។

លោក បានបន្តថា ក្នុងចំណោមព្រះសង្ឃ ដែលមានឆ្លងជំងឺកូវីដ១៩ចំនួន២៣៩អង្គនោះនៅតាមរាជធានីខេត្តចំនួន​៧ក្នុងនោះរាជធានីភ្នំពេញមានឆ្លងច្រើនជាងគេចំនួន១៣៤ អង្គកំពុងព្យាបាលចំនួន៦៨ អង្គ ជាសះស្បើយចំនួន៦៥ អង្គសុគត១ អង្គ។

ខេត្តកណ្ដាល មានព្រះសង្ឃ១អង្គបានជះសះស្បើយ ខេត្តកំពតមាន ១០ អង្គ កំពុងសម្រាកព្យាបាល ខេត្តត្បូងឃ្មុំ មាន ៨៨ អង្គ កំពុងសម្រាកព្យាបាល និងតាជី ៤ នាក់ ខេត្តព្រៃវែង មាន ០៤ អង្គ កំពុងសម្រាកព្យាបាល ៣ អង្គ និងសុគត​១អង្គ ខេត្តស្វាយរៀងមាន ១ អង្គ និងខេត្តកំពង់ចាម មាន១ អង្គកំពុងសម្រាកព្យាបាល។

លោក សេងសុមុនីបានបន្ថែមទៀតថាមូលហេតុដែលបណ្តាលឱ្យព្រះសង្ឃឆ្លងជំងឺកូវីដ១៩គឺព្រះសង្ឃខ្លះបានឆ្លងពីក្មេងវត្តធ្វើជាកម្មករចេញទៅធ្វើការនៅខាងក្រៅហើយបានចម្លងជំងឺដល់ព្រះសង្ឃនិងព្រះសង្ឃខ្លះទៀតបានឆ្លងជំងឺកូវីដ១៩​ពេលព្រះអង្គចេញនិមន្តបិណ្ឌបាត្រនៅខាងក្រៅដែលករណីទាំងនេះកើតនៅរាជធានីភ្នំពេញ។ ចំណែកព្រះសង្ឃតាមខេត្តឆ្លងជំងឺកូវីដ១៩វិញភាគច្រើនព្រះអង្គបានចូលរួមពិធីបុណ្យទានផ្សេងៗ។

អ្នកនាំពាក្យក្រសួងធម្មការបានអំពាវនាវឱ្យព្រះសង្ឃនិមន្តទៅចាក់វ៉ាក់សាំងការពារជំងឺកូវីដ១៩ឱ្យបានគ្រប់អង្គដើម្បីឱ្យមានភាពស៊ាំសំដៅទប់ស្កាត់ការឆ្លងរីករាលដាលជំងឺកូវីដ១៩ខណៈរហូតមកដល់ពេលនេះមានព្រះសង្ឃប្រមាណ​៥០០០ ​អង្គនៅទូទាំងប្រទេសទទួលបានការចាក់វ៉ាក់សាំងការពារជំងឺកូវីដ១៩ក្នុងចំណោមព្រះសង្ឃជាង២ម៉ឺនអង្គដែលមានព្រះជន្មពី១៨ឆ្នាំឡើងទៅ។

គួរបញ្ជាក់ថាគិតត្រឹមព្រឹក ថ្ងៃទី២០ ខែកក្កដាឆ្នាំ២០២១កម្ពុជាមានអ្នកឆ្លងជំងឺកូវីដ១៩សរុបចំនួន៦៨៧៩៦នាក់អ្នកជា​សះ​ស្បើយចំនួន៦១០៣៩នាក់និងស្លាប់១១៤៩នាក់៕ អត្ថបទ៖ សំអឿន