ជីតាប៉ងរំលោភចៅស្រី៩ឆ្នាំ​ពុំបានសម្រេច ​តែត្រូវប៉ូលិសចាប់ខ្លួន

កងកម្លាំងសមត្ថកិច្ចនៃអធិការដ្ឋាននគរបាលស្រុកមណ្ឌលសីមា ខេត្តកោះកុង បានឃាត់ខ្លួនបុរសវ័យ៥៩ឆ្នាំម្នាក់ដែលប៉ុនប៉ងធ្វើសកម្មភាពរំលោភសេពសន្ថវៈទៅលើកុមារីអាយុ៩ឆ្នាំជាចៅស្រីរបស់ខ្លួន។

លោកស្រីវរៈសេនីយ៍ឯក ពេជ្រ ស្រីពីរ ស្នងការរងនគរបាលខេត្តកោះកុង ទទួលបន្ទុកផែនការជួញដូរមនុស្ស និងអនីតិ​ជន បានឱ្យដឹងថា ការឃាត់ខ្លួនបុរសចំណាស់ម្នាក់នេះ ធ្វើឡើងកាលពីវេលាម៉ោ១០និង០០នាទីរព្រឹកថ្ងៃទី១៩ ខែកក្កដា នៅចំណុចប៉ានីត ភូមិចាំយាម ឃុំប៉ាក់ខ្លង។ ជនសង្ស័យឈ្មោះ ផេង ឃុនឆាយ អាយុ៥៩ឆ្នាំ មានទីលំនៅកើតហេតុខាងលើ។

លោកស្រីស្នងការរងខេត្ត បានបន្ថែមថា ការប៉ងរំលោភនេះពុំបានសម្រេចទេ ពីព្រោះជីដូនរបស់កុមារីរងគ្រោះបានមកទាន់ពេលវេលា ហើយប្តឹងទៅនគរបាលចុះមកឃាត់ខ្លួនភ្លាមៗផងដែរ។

កុមារីរងគ្រោះឈ្មោះ រ.ស.ន អាយុ៩ឆ្នាំ ត្រូវជាចៅស្រី។ ក្រោយសាកសួរធ្វើតេស្តរកកូវីដីអវិជ្ជមាន សមត្ថកិច្ចនគរបាលស្រុកមណ្ឌលសីមា ក៏បានសំណុំរឿងបញ្ជូនទៅឲ្យការិយាល័យជួញដូរមនុស្យ និងអនិតិជនខេត្ត ហើយកម្លាំងជំនាញខេត្តពុំទាន់បញ្ចូនសំណុំទៅតុលាការអនុវត្តនីតិវិធីទេ ព្រោះគ្រួសារសុំដកពាក្តបណ្តឹងវិញ ក្រោយហេតុផលយល់ច្រឡំ។

ករណីរំលោភសេពសន្ថវៈពុំកើតមានច្រើនទេសម្រាប់មូលដ្ឋាននៅខេត្តកោះកុងនៅឆ្នាំ២០២០ ដោយអាជ្ញាធរ និងមន្រ្តីជំនាញ ផ្សព្វផ្សាយអប់រំណែនាំជាច្រើនពីបញ្ហានេះ រីឯពលរដ្ឋក៏មានការយល់ដឹងច្រើនណាស់ដែរពីបទល្មើសជួញមនុស្ស និងការពារអនីតិជន៕ អត្តបទៈ សិរីវឌ្ឍនៈ