ជំនួយវ៉ាក់សាំង ១ លានដូស របស់រដ្ឋាភិបាលជប៉ុន នឹង​ដឹកមកដល់កម្ពុជា នៅយប់ថ្ងៃ ២៣ កក្កដា

ជំនួយវ៉ាក់សាំងប្រឆាំងជំងឺកូវីដ-១៩ ប្រភេទ AstraZeneca ពីរដ្ឋាភិបាលជប៉ុន តាមយន្តកាCOVAX នឹងដឹកមកដល់ព្រលាន​យន្ត​ហោះ​អន្តរជាតិភ្នំពេញ​ នៅ​ម៉ោង ៩ យប់ថ្ងៃទី ២៣ ខែកក្កដា ឆ្នាំ២០២១នេះ។

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅប្រទេសកម្ពុជា បានលើកឡើងកាលពីថ្ងៃទី ១៣ ខែកក្កដានេះថាជំនួយនេះ ធ្វើឡើងស្របតាមចំណងមិត្តភាពរវាងជប៉ុន និងកម្ពុជាដោយផ្អែកលើស្ថានភាព​កូវីដ១៩ នៅប្រទេសកម្ពុជា​នាពេលបច្ចុប្បន្ន។

លោក មិកាមិ ម៉ាសាហ៊ីរ៉ូ បានលើកឡើងក្នុងសេចក្ដីប្រកាសថា ការផ្តល់ជំនួយវ៉ាក់សាំងនេះនឹងជួយគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការប្រយុទ្ធប្រឆាំងនឹង​កូវីដ-១៩ ក៏ដូចជាកាត់បន្ថយការព្រួយបារម្ភមួយចំនួនរបស់ប្រជាជនកម្ពុជាផងដែរ។

ក្រៅពីផ្ដល់វ៉ាក់សាំងនោះ រាជរដ្ឋាភិបាលជប៉ុនក៏បានផ្ដល់ជំនួយច្រើនជាង៥០លាន​ដុល្លារដល់​កម្ពុជា រួមមាន ការ​ផ្ដល់បរិក្ខារពេទ្យ ការកែលម្អមន្ទីរពេទ្យ ការគាំទ្រដល់គម្រោងរបស់អង្គការអន្តរ​ជាតិនានាសម្រាប់វិធានការ​ទប់ស្កាត់ការចម្លងជំងឺកូវីដ-១៩នៅតាមព្រំដែន ក៏ដូចជាការផ្ដល់បរិក្ខារសម្រាប់​ដឹកជញ្ជូននិងរក្សាទុកវ៉ាក់សាំង​​ឱ្យបានត្រឹមត្រូវជាដើម។

តាមរយៈយន្តការCOVAX កម្ពុជាទទួលបានជំនួយវ៉ាក់សាំងប្រភេទ AstraZeneca ៣២៤ ០០០ ដូស ក្រៅពីនេះ គឺជាវ៉ាក់សាំងដែលបានមកពីការបញ្ជាទិញ និងជំនួយពីប្រទេសចិន គឺវ៉ាក់សាំង ស៊ីណូហ្វាម និងវ៉ាក់សាំង​​ស៊ីណូវ៉ាក់៕