អំណោយសម្ដេចតេជោ ឧបត្ថម្ភដល់បុគ្គលិក​ដោះមីន ១៨៥ នាក់ កំពុង​ជាប់ធ្វើចត្តាឡីស័ក

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បាន​ផ្ដល់អំណោយ​ជូនដល់​បុគ្គលិកដោះមីន បម្រើការងារនៅអង្គការ MAG ចំនួន ១៨៤ នាក់ ដែលកំពុងជាប់ធ្វើចត្តាឡីស័ក នៅស្រុកសំឡូត ខេត្តបាត់ដំបង។

ជាអំណោយដ៍ថ្លៃថ្លាមានគ្រឿបឧបភោគបរិភោគ និងថវិកា​តាមរយៈ លោក​ទេសរដ្ឋមន្ត្រីលី ធុជ អនុប្រធានអាជ្ញាធរមីន ដែលបានប្រគល់ជូននៅព្រឹកថ្ងៃទី ២២ ខែកក្កដា ឆ្នាំ ២០២១នេះ។

គ្រឿងឧបភោគ បរិភោគទាំងនោះមានការចូលរួមចំណែកឧបត្ថម្ភពីអាជ្ញាធរមីនសាខាកាកបាទក្រហម កម្ពុជា ខេត្តបាត់ដំបង និងមូលនិធិ Sir Bobby Charlton ប្រចាំ កម្ពុជា រួមមាន៖ អង្ករ, ទឹកបរិសុទ្ធ, ទឹកស៊ីអ៊ីវ, មី, ត្រីខកំប៉ុង, សាច់ក្រក, ត្រីងៀត,ម៉ាស់ និងអាល់កុល។

ក្រៅពីគ្រឿង ឧបភោគបរិភោគ លោកទេសរដ្ឋមន្រ្តី បាននាំយកនូវថវិកាឧបត្ថម្ភដល់អ្នកវិជ្ជមានកូវីដជាបុគ្គលិកអង្គការ MAG ចំនួន ៣នាក់ ដោយក្នុងម្នាក់ ៥០ ម៉ឺនរៀល និងថវិកា ៤ លានរៀល សម្រាប់ការងារធ្វើចត្តាឡីស័ក។

លោក ទេសរដ្ឋមន្ត្រី បានសម្ដែង នូវការដឹងគុណ និងកត្តញ្ញូតាធម៌ដ៏ខ្ពង់ខ្ពស់បំផុតជូនចំពោះសម្តេច តេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជាដែលសម្តេចទាំងទ្វេតែងតែយកចិត្ត ទុកដាក់អាណិតអាសូរនិងគិតគួរដល់សុខទុក្ខរបស់ប្រជាពលរដ្ឋកម្ពុជាក៏ដូចជាការឧបត្ថម្ភគាំទ្រដល់បុគ្គលិក ដោះមីនទាំងអស់រាល់ទុក្ខលំបាកនិងគ្រប់ពេលវេលា។

លោកទេសរដ្ឋមន្ត្រីមានប្រសាសន៍លេីកឡេីងថា «រាជរដ្ឋាភិបាលកម្ពុជាក្រោមការដឹកនាំដ៏ខ្ពង់ខ្ពស់របស់ សម្តេច តេជោ នាយករដ្ឋមន្ត្រីបាននាំមកនូវសុខសន្តិភាព និងស្ថេរភាព នយោបាយពាសពេញផ្ទៃប្រទេសជូន ជាតិមាតុភូមិរួចហើយអញ្ចឹងបងប្អូនអ្នកដោះមីនដែលជា ក្មេងជំនាន់ក្រោយពិតជាមានភារកិច្ចយ៉ាងសំខាន់ ក្នុងការចូលរួមជាមួយសម្តេចតេជោដល់កិច្ចគាំពារសន្តិភាព និងការ អភិវឌ្ឍ»។

លោកបានបន្តទៀតថាការងារបោសសម្អាតមីននៅកម្ពុជានៅតែបន្តទៅមុខជានិច្ចទោះបីមានការរីករាលដាលជំងឺកូវីដក៏ដោយព្រមទាំងបានណែនាំឲ្យបុគ្គលិកអ្នកដោះមីនទាំងអស់ត្រូវបន្តមានការប្រុងប្រយ័ត្នខ្ពស់រក្សា អនាម័យ និងថែរក្សាសុខភាពជាពិសេសត្រូវបន្តអនុវត្តន៍តាមវិធានការណែនាំដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ៣ការពារ ៣ កុំ ឱ្យបានខ្ជាប់ខ្ជួន។

សូមបញ្ជាក់ថាអង្គការMAGបានបម្រើការងារសកម្មភាពមីនមនុស្សធម៌នៅកម្ពុជាចាប់តាំងពីឆ្នាំ១៩៩២ ហើយបច្ចុប្បន្ននេះមានបុគ្គលិកចំនួន៦១០នាក់ ក្នុងនោះបុគ្គលិកបរទេសចំនួន ៧នាក់ ប្រតិបត្តការ ការងារ នៅខេត្តចំនួន ០៣ រួមមានខេត្តបាត់ដំបង ខេត្តប៉ៃលិន និងខេត្ត រតនគីរី។

គិតត្រឹមខែធ្នូឆ្នាំ ២០២០ អង្គការ MAG បានរំដោះផ្ទៃដីមានមីន និងសំណល់ជាតិផ្ទុះពីសង្គ្រាមប្រមាណ ៩៥ គីឡូម៉ែត្រ ក្រឡារកឃើញ និងកម្ទេចមីនប្រឆាំងមនុស្សបានចំនួន ៨១,០៤៧ គ្រាប់មីនប្រឆាំង រថក្រោះ ១,២៤០ គ្រាប់ និងគ្រាប់មិនទាន់ផ្ទុះ២៦៩,៦៧៤ គ្រាប់ព្រមទាំងមានអ្នកទទួលផលប្រមាណ២លាននាក់៕