ព័ត៌មានជាតិ

មេបញ្ជាការតំបន់ប្រតិបត្តិការសឹករងកំពង់ធំ ផ្ដល់អំណោយស្បៀងអាហារ ជូនគ្រួសារយោធិន

បានផុស

៤ years មុន

នៅ

ថ្ងៃព្រហស្បតិ៍ ២២ កក្កដា ២០២១

ដោយ

ឧត្តមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បាននាំយកអំណោយស្បៀងអាហារ ដែលជាជំនួយឧបត្ថម្ភរបស់សប្បុរសជន ក្នុងវិស័យមនុស្សធម៌ ផ្ដល់ជូនដល់ក្រុមគ្រួសារយោធិនដែលមានជីវភាពលំបាកខ្វះខាត ១២ គ្រួសារ ដែកកំពុងតែរស់នៅក្នុងបន្ទាយជាមួយស្វាមី នៃបញ្ជាការតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ នៅព្រឹកថ្ងៃទី២២ ខែកក្កដា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧត្តមសេនីយ៍ទោ សោម ស៊ុន បានថ្លែងអំណរគុណដ៏ជ្រាលជ្រៅជាទីបំផុត ចំពោះសប្បុរសជននានាដែលបានជួយឧបត្ថម្ភស្បៀងអាហារក្នុងវិស័យមនុស្សធម៌ ជួយដល់ការលំបាកខ្វះខាត របស់ក្រុមគ្រួសារអតីតយុទ្ធជន និងគ្រួសារយោធិន ក៏ដូចជាប្រជាពលរដ្ឋដែលជួបការលំបាកខ្វះខាត។

មេបញ្ជាការតំបន់ប្រតិបត្តិការសឹករងកំពង់ធំ បានណែនាំដល់គ្រួសារយោធិនទាំងអស់ ដែលរស់នៅក្នុងបន្ទាយ ត្រូវខិតខំបង្កបង្កើនផល ចិញ្ចឹមសត្វ ដើម្បីដោះស្រាយជីវភាពគ្រួសារ រួមផ្សំនឹងគោលរបបរបស់ស្វាមី ដែលថ្នាក់លើបានផ្ដល់ជូន និងសូមឱ្យគ្រួសារយោធិនទាំងអស់ ត្រូវតែប្រុងប្រយ័ត្នការពារខ្លួន ឲ្យជៀសផុតពីជំងឺកូវីដ១៩ ដោយត្រូវអនុវត្តឱ្យបានត្រឹមត្រូវ តាមវិធានការនានារបស់ក្រសួងសុខាភិបាល ៣ការពារនិង ៣កុំ របស់សម្ដេចតេជោ ហ៊ុន សែន។

ចំណែកស្បៀងអាហារ ដែលបានជួយឧបត្ថម្ភជូនគ្រួសារយោធិន ដែលមានជីវភាពលំបាកខ្វះខាតនៅពេលនេះ ដោយក្នុងមួយគ្រួសារទទួលបាននូវអង្ករចំនួន២៥ គីឡូក្រាម មីមួយកេស ទឹកត្រីមួយយួរ និងត្រីខកំប៉ុងមួយយួរ សម្រាប់ដោះស្រាយជីវភាពប្រចាំថ្ងៃ។ គ្រួសារយោធិន បានគោរពថ្លែងអំណរគុណ ចំពោះសប្បុរសជន និងថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលជានិច្ចកាលតែងតែផ្សារភ្ជាប់ពីសុខទុក្ខ និងជីវភាពរស់នៅរបស់យោធិន ទូទាំងអង្គភាព និងជូនពរឯកឧត្តម អស់លោក លោកស្រីសម្បុរសជន ទាំងអស់បានជួបតែសេចក្តីសុខ សេចក្តីចម្រើន និងប្រកបដោយពុទ្ធពរទាំងបួនប្រការ និងសម្រេចជោគជ័យគ្រប់ភារកិច្ច៕

អត្ថបទ៖ ប៊ុន រដ្ឋា