ចុះប្រមូលអាជីវករ អ្នកទិញម្ហូបតាមផ្លូវជាង ៤០០នាក់ទៅធ្វើតេស្ត​ រកឃើញ​វិជ្ជមាន​កូវីដ​ ១៦​នាក់

កងកម្លាំងនគរបាលក្រុងព្រះសីហនុ បានចុះប្រមូលអាជីវករលក់ដូរនិងអ្នកមកទិញម្ហូបអាហារតាមបណ្តោយផ្លូវពីកែងផ្លូវអូរ២ ផ្លូវកែងមន្ទីរកសិកម្ម រហូតដល់កែងផ្លូវកែងសាលាវិទ្យាល័យ ចំនួន៤១៣នាក់យកសំណាកទៅធ្វើតេស្តរកជំងឺកូវី-១៩ ក្នុងនោះមានវិជ្ជមានចំនួន១៦នាក់។

ការចុះប្រមូលនេះបានធ្វើឡើងនៅព្រឹកថ្ងៃទី២២ ខែកក្ដដា ឆ្នាំ២០២១នៅសង្កាត់៤ ចំនុចសាលា វិទ្យាល័យហ៊ុន សែន មិត្តភាព។

បើតាមរបាយការណ៍ដែលបានបង្ហោះនៅលើផេកហ្វេប៊ុករបស់អគ្គស្នងការដ្ឋាននគរបាលជាតិនៅរសៀលនេះ ក្នុងចំណោមអ្នកធ្វើតេស្តចំនួន ៤១៣នាក់ ក្នុងនោះមានវិជ្ជមាន ចំនួន ១៦នាក់ ស្រី៦ នាក់រួមមានកម្មករសំណង់ ចំនួន៤ នាក់ អ្នកនៅផ្ទះ ចំនួន ៦ នាក់ សិស្ស-និសិត្ស ២ នាក់ បុគ្គលិកក្រុមហ៊ុន ចំនួន ១ នាក់និងគ្រូបង្រៀន ចំនួន ១ នាក់បុគ្គលិកក្រុមហ៊ុនសន្តិសុខ ឯកជន ចំនួន ១ នាក់និងអាជីវករចល័ត ចំនួន ១ នាក់។

ការរចុះប្រមូលអាជីវករនិងអ្នកមកទិញម្ហូប តាមបណ្តោយផ្លូវជាង៤០០នាក់ទៅធ្វើតេស្តរកជំងឺកូវីដ-១៩នោះបានប្រើប្រាស់កម្លាំងចំនួន ៦៣នាក់ ក្នុងនោះមានកម្លាំងក្រុមពិន័យអន្តរការណ៏ ចំនួន ៤៣ នាក់ កម្លាំងការិយាល័យចរាចរណ៏ផ្លូវគោក១០នាក់និងកម្លាំងកងរាជអាវុធហត្ថខេត្តចំនួន១០ នាក់ដោយប្រើមធ្យោបាយរថយន្តចំនួន ៣ គ្រឿងនិងម៉ូតូ ៧ គ្រឿង៕

អត្ថបទ៖ សំអឿន