អ្នកនាំពាក្យប្រាប់​មូលហេតុ​ឆ្មក់​ តាម​ផ្សារ​លក់ដូរ តេស្ត​រកអ្នក​ឆ្លង​កូវីដ​

ភ្នំពេញ៖ លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅរសៀលថ្ងៃ​ទី​២៣ កក្កដា​នេះថា ការចុះយកសំណាកចល័តនៅក្នុងភូមិសាស្ត្រក្រុងព្រះសីហនុ គឺយកទីតាំងណាដែលមាន​ហានិភ័យ​ខ្ពស់ប៉ុណ្ណោះ ពិសេសទីតាំងលក់ដូរតាមចិញ្ចើមផ្លូវដែលមានមនុស្សប្រមូលផ្តុំច្រើន។

លោកបានបន្តថា រហូតមកដល់ពេលនេះ ការចុះយកសំណាកនេះធ្វើបានចំនួនពី៧ទៅ៨ទីតាំង ហើយបានរកឃើញ​មានអ្នកឆ្លងជាបន្តបន្ទាប់ ដែលជាវិធានការមួយមានប្រសិទ្ធភាពសំដៅកាត់ផ្តាច់ការចម្លងពីមនុស្សម្នាក់ទៅមនុស្សម្នាក់ទៀត។

លោកបានបន្តទៀតថា « កាលណាយើងមិនអត់ចុះយកសំណាកទេ ការឆ្លងនៅតែមានអាចឆ្លងពីអ្នកលក់ទៅអ្នកទិញឬអ្នកទិញឆ្លងទៅអ្នកលក់ឆ្លងទៅវិញទៅមក។ អីចឹងហើយទើបវិធានការរបស់អាជ្ញាធរ​ខេត្ត​គឺត្រូវយកសំណាកចល័តទៅតាមទីតាំងដែមានការប្រមូលផ្តុំបែបហ្នឹង»។

លោក បានបន្ថែមទៀតថា «យើងនឹងបន្តអនុវត្តការងារនេះជាប្រចាំបន្តទៅទៀត។ ការយកសំណាកចល័តនៅតែបន្តធ្វើ ហើយការរៀបចមទីតាំងទៅយកសំណាកតាមតំបន់ផ្សេងៗយើងក៏នៅតែបន្តធ្វើដែរ»។

គួរបញ្ជាក់ថា កាលពីថ្ងៃទី២២កក្កដាឆ្នាំ២០២១កងកម្លាំងនគរបាលក្រុងព្រះសីហនុ បានចុះប្រមូលអាជីវករលក់ដូរនិងអ្នកមកទិញម្ហូបអាហារតាមបណ្តោយផ្លូវពីកែងផ្លូវអូរ២,ផ្លូវកែងមន្ទីរកសិកម្ម រហូតដល់កែងផ្លូវ​កែង​សាលាវិទ្យាល័យ ចំនួន៤១៣នាក់យកសំណាកទៅធ្វើតេស្តរកជំងឺកូវី-១៩ក្នុងនោះមានវិជ្ជមានចំនួន​១៦​នាក់ រួមមានកម្មករសំណង់ ចំនួន៤ នាក់ អ្នកនៅផ្ទះ ចំនួន ៦ នាក់ សិស្ស-និសិត្ស ២ នាក់ បុគ្គលិកក្រុមហ៊ុន ចំនួន ១ នាក់និងគ្រូបង្រៀន ចំនួន ១ នាក់បុគ្គលិកក្រុមហ៊ុនសន្តិសុខ ឯកជន ចំនួន ១ នាក់និងអាជីវករចល័ត ចំនួន ១ នាក់៕

អត្ថបទ៖ សំអឿន