គណៈកម្មការទី៧ នៃរដ្ឋសភា សម្រេចបានសមិទ្ធផលមួយចំនួន គួរឲ្យកត់សម្គាល់ ក្នុងវិស័យទទួលខុសត្រូវរបស់​ខ្លួន

គណៈកម្មការអប់រំ​ យុវជន​ កីឡា​ ធម្មការ​ សាសនា វប្បធម៌ និងទេសចរណ៍ ដែលជាគណៈកម្មការទី៧ នៃរដ្ឋសភា នៅព្រឹកថ្ងៃទី២៦ ខែកក្កដា ឆ្នាំ២០២១នេះ បានរៀបចំកិច្ចប្រជុំផ្ទៃក្នុង គណៈកម្មការ​ តាមប្រព័ន្ធអនឡាញ ដើម្បីពិនិត្យពិភាក្សា ​លើរបាយការណ៍សកម្មភាពឆមាសទី១​ ឆ្នាំ២០២១​ និងលើកទិសដៅការងារបន្តរបស់ខ្លួន​ ក្រោមអធិបតីភាពលោក ហ៊ុន​ ម៉ានី​ ប្រធានគណៈកម្មការ ព្រមទាំងមានវត្តមាន លោក-លោកស្រីអនុប្រធាន​ លេខាធិការ សមាជិក​-សមាជិកា​ និងក្រុមការងារជំនួយការផងដែរ។

បើតាមទំព័រហ្វេសប៊ុកផ្លូវការ របស់រដ្ឋសភា បានឲ្យដឹងថា ក្នុងកិច្ចប្រជុំនេះ បានពិនិត្យលើរបាយការណ៍ សកម្មភាពការងារ របស់គណៈកម្មការកន្លងមក​ ក្នុងក្របខ័ណ្ឌនៃតួនាទី និងភារកិច្ចដែលមានចែង ក្នុងរដ្ឋធម្មនុញ្ញ​​ បទបញ្ជាផ្ទៃក្នុង​ លិខិតបទដ្ឋាន និងការប្រគល់ភារកិច្ច របស់គណៈកម្មាធិការអចិន្រ្តៃយ៍។

​ក្នុងនោះ​​​​​ គណៈកម្មការសម្រេច បានសមិទ្ធផលមួយចំនួន គួរឲ្យកត់សម្គាល់ ក្នុងវិស័យទទួលខុសត្រូវ របស់គណៈកម្មការរួមមាន៖ ការចូលរួមបង្កើត​​កម្មវិធីស្វ័យសិក្សា​​ E-Learning​ ការសួរសុខទុក្ខលោកគ្រូ​-អ្នកគ្រូ​​ ព្រឹទ្ធាចារ្យសិល្បៈ ការរៀបចំជំនួយស្មារតីជូនថ្នាក់ដឹកនាំ សមាជិក-សមាជិកា គណៈកម្មាធិការអចិន្រ្តៃយ៍រដ្ឋសភា ខ្លឹមសារគោលនៃ «ផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍កម្ពុជា​ ក្នុង និងក្រោយវិបត្តិកូវីដ១៩» និង «ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥« និងគម្រោងស្តីពី «ការធ្វើដំណើរទេសចរណ៍សុវត្ថិភាព» ជាដើម។

ជាមួយគ្នានេះ ទោះបីស្ថិតក្នុងបរិបទ ​នៃការឆ្លងរាលដាលនៃជំងឺកូវីដ-១៩ក៏ដោយ ក៏គណៈកម្មការទី៧ នៃរដ្ឋសភា នៅតែបន្តសកម្មភាពរបស់ខ្លួន ដើម្បីជាឧត្តមប្រយោជន៍ជាតិ​ និងប្រជាជន​ ជាពិសេសការចូលរួម ជាមួយរាជរដ្ឋាភិបាល ក្នុងការប្រយុទ្ធនឹងការឆ្លងរាលដាល នៃជំងឺកូវីដ-១៩​ តាមរយៈការបន្តផ្សព្វផ្សាយ បញ្ជ្រាបការយល់ដឹងពីវិធីបង្ការ ការឆ្លងទៅកាន់ស្រទាប់មហាជន ក៏ដូចជាសិស្ស-និស្សិតផងដែរ៕ (ដោយ)៖ ឃួន សុភ័ក្រ