បុរសម្នាក់ចុកថប់ដង្ហើម​ស្លាប់​សង្គ្រោះមិនទាន់ គ្រូពេទ្យបញ្ជាក់ថាខ្យល់គរ

បុរសម្នាក់បានត្រលប់មកពីធ្វើការវិញពិសារបាយជាមួយប្រពន្ធរួចស្រាប់តែមានអាការមិនស្រួលខ្លួនត្រូវបានអ្នកជិតខាងនាំគ្នាជួយលើកចុះពីផ្ទះជួលមកក្រោមដើម្បីដឹកទៅសង្គ្រោះនៅមន្ទីរពេទ្យ តែអកុសលជនរងគ្រោះ ក៍បានដាច់ ខ្យល់ស្លាប់ភ្លាមៗតែម្ដង បង្កការភ្ញាក់ផ្អើលឡើងនៅវេលាម៉ោង១០យប់ នៅចំណុចផ្ទះជួ​ល​ក្រោយបុរីអរគីដេរ ភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។

សពបុរសជនងគ្រោះមានឈ្មោះ ជាង សំបូរ អាយុ៣៥ឆ្នាំ ជាបុគ្គលិកផ្នែកអចលនទ្រព្យស្នាក់នៅផ្ទះជួលជាន់ទី២ ភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ មានស្រុកកំណើតនៅខេត្តតាកែវ។

ប្រពន្ធសពបុរសរងគ្រោះ​បានឱ្យដឹងថា មុនពេលកើតហេតុប្តីរបស់នាងហូបបាយរួចស្រាប់តែមានអាការចុក​ថប់​​ដង្ហើមបាត់មាត់បាត់កពេលឃើញដូច្នេះហើយរូបគាត់បានហៅអ្នកជិតខាងឱ្យ​ជួយ​សង្រ្គោះបឋម ដោយការរឹតទ្រូង និងលាបប្រកូឡា ហើយបានលើកមកជាន់ដី ដើម្បីបញ្ជូនទៅសង្គ្រោះនៅមន្ទីរពេទ្យខណៈមក​ដល់ដីជនរងគ្រោះមានអាការកាន់តែធ្ងន់ធ្ងនរទៅលែងនិយាយស្ដីអ្វីទាំងអស់ រហូតទាល់តែមានរថយន្តសង្គ្រោះទៅយកបានពិនិត្យឃើញថា ប្ដីរបស់គាត់បានផុតដង្ហើមបាត់ទៅហើយ។

បន្ទាប់មកមកឃើញមានកម្លាំងសមត្ថកិច្ចមូលដ្ឋានបានចុះទៅ ពិនិត្យកន្លែងកើតហេតុរួចហើយក៍បានឲ្យក្រុមគ្រូពេទ្យ យកសំណាកដើម្បីពិនិត្យរកជំងឺកូវីដ១៩ តែលទ្ធផលគឺអវិជ្ជមាន ទើបឱ្យសមត្ថកិច្ចជំនាញធ្វើការបន្ត។

ក្រោយពេលកើតហេតុ សមត្ថកិច្ចបានធ្វើកំណត់ហេតុ និងពិនិត្យរួចថា ជនរងគ្រោះ  បានស្លាប់ដោយសារខ្យល់​គររួចហើយក៍បានប្រគល់សពឱ្យទៅសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត៕ អត្ថបទ៖ ឧត្តរ៉ា