បុរសម្នាក់ ចូលដកលុយនៅទូ អេធីអឹម ចតរថយន្តមិនពន្លត់ម៉ាស៊ីន ចេញមកវិញបាត់រថយន្ត!

បុរសជនជាតិចិនម្នាក់ បានធ្វើដំណើរទៅកាន់ប៉ុស្តិ៍នគរបាល ដើម្បីសុំការអន្តរាគមន៍ បន្ទាប់ពីបើករថយន្តម៉ាក Lexus RX300 ចូលទៅដកលុយនៅទូអេធីអឹម ដោយមិនបានពន្លត់ម៉ាស៊ីន លុះចេញមកវិញស្រាប់តែបាត់រថយន្ត។ ហេតុការណ៍ ដែលបង្កការភ្ញាក់ផ្អើលនេះ កើតឡើងកាលពី វេលាម៉ោង៩យប់ ថ្ងៃទី២៦ ខែកក្កដា ឆ្នាំ២០២១  ស្ថិតនៅតាមបណ្តោយផ្លូវជាតិលេខ១ ស្ថិតនៅក្នុងសង្កាត់ ច្បារអំពៅ២ ខណ្ឌច្បារអំពៅ រាជធានីភ្នំពេញ។

យោងតាមប្រភពព័ត៌មានពីអ្នកបកប្រែ បានឲ្យដឹងថា ម្ចាស់រថយន្តមានឈ្មោះ Wei Shuangma អាយុ៧៩ ឆ្នាំ។ ប្រភពដដែល បានឲ្យដឹងទៀតថា នៅមុនពេលកើតហេតុ ម្ចាស់រថយន្តខាងលើ បានបើករថយន្តមួយគ្រឿងម៉ាក Lexus RX300 ពាក់ស្លាកលេខ 2S-6160 ពណ៌ប្រផេះ បានចតរថយន្តបញ្ឆេះចោល នៅមុខធនាគារ «ឈីហ្វ» គោលបំណងចូលទៅដកលុយ។ ក្រោយពេលដកលុយរួច ចេញមកវិញស្រាប់តែបាត់រថយន្តតែម្តង។

ក្រោយពេលកើតហេតុ ម្ចាស់រថយន្តបានទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលខណ្ឌច្បារអំពៅ២ ដើម្បីសុំការអន្តរាគមន៍៕

អត្ថបទ ៖ សុខា