បើក​ផ្សារកណ្តាល​វិញ ​ក្រោយពី​បិទ​រយៈពេល​១៤​ថ្ងៃ ជា​លើក​ទី​២

​បន្ទាប់ពី​បិទ​ជា​លើក​ទី​២​នោះ​ផ្សារកណ្តាល ដែលមានទីតាំងស្ថិតនៅក្នុងសង្កាត់ផ្សារកណ្តាលទី១ ខណ្ឌដូនពេញ ​រាជធានី​ភ្នំពេញ​ ត្រូវ​បាន​អាជ្ញាធរ​បើកឲ្យ​ដំណើរការឡើងវិញហើយ​។​

​ផ្សារកណ្តាល​ ត្រូវបាន​ផ្អាកជាបណ្តោះអាសន្នអស់រយៈពេល១៤ថ្ងៃកន្លងមក ​គឺ​ពីថ្ងៃទី១៣ ខែកក្កដា ឆ្នាំ២០២១ ដោយសារតែផ្ទុះជំងឺកូវីដ១៩ ជា​លើក​ទី​២​ទៅលើគណៈកម្មាធិការផ្សារ និង ក្រុមអាជីវករលក់ដូរក្នុងផ្សារ។​ លុះដល់ថ្ងៃទី២៧ ខែកក្កដា ឆ្នាំ២០២១នេះ ទើប​សម្រេច​បើក​ដំណើរការ​ជាធម្មតា​វិញ​។ ​ក្រោយពីគណៈកម្មការផ្សារ និង ក្រុមអាជីវករទាំងអស់ ធ្វើសំណាក ជា លើកទី២ កាលពីថ្ងៃទី២៥ ខែកក្កដា ឆ្នាំ២០២១​នេះ​។​

​គណៈកម្មការ​ផ្សារកណ្តាល​បាន​ឲ្យ​ដឹងថា ​ការ​បើក​ដំណើរការឡើងវិញ​ផ្សារ​នេះ ​ក្រោយពី មានការអនុញ្ញាតអំពីសាលាខណ្ឌដូនពេញ ក៏ដូចជាសាលារាជធានីភ្នំពេញរួចមក ដោយខាង ផ្សារអនុវត្តទៅតាមការណែនាំរបស់រាជរដ្ឋាភិបាល ក៏ដូចជាខាងក្រសួងសុខាភិបាលនូវ វិធានការ «៣ការពារ ៣កុំ » និងរក្សាគម្លាតសុវត្ថិភាពជាដើម។ ក្នុងថ្ងៃបើកដំណើរការផ្សារកណ្តាល ជា ធម្មតាវិញនេះ​ ខាងគណៈកម្មាធិការផ្សារ បានចាប់ផ្តើមធ្វើការត្រួតពិនិត្យទៅលើកា ចាក់ វ៉ាក់សាំងរបស់បងប្អូនអាជីវករទាំងអស់គ្នា ដែលបានចូលមកលក់ដូរក្នុងថ្ងៃនេះ បានឃើញថា ពួកគាត់ភាគច្រើនស្ទើរតែទាំងអស់គ្នា សុទ្ធតែបានចាក់វ៉ាក់សាំងលើកទី២រួចរាល់ហើយ។​

​ដោយឡែក​សម្រាប់ក្រុមអាជីវករណា ដែលមិនទាន់បានយកសំណាកជាលើកទី២ កាលពីថ្ងៃទី ២៥ ខែកក្កដា ឆ្នាំ២០២១កន្លងមក ក៏សូមមេត្តានាំគ្នាទៅយកសំណាកនៅសាលាបាក់ទូក ឬ ក៏ម៉ូ ឌែន៥ជាបន្តទៀតផងដែរ។ សម្រាប់បងប្អូនប្រជាពលរដ្ឋជាអ្នកមកផ្សារកណ្តាលវិញ ខាង​ផ្សារ​ក៏បាន​ដើរផ្សព្វផ្សាយតាមមេក្រូ នៅគ្រប់ច្រកចេញ ឬ ចូលផ្សារជាប្រចាំ ដោយធ្វើការណែនាំ ដល់ ពួកគាត់មាន ដបអាល់កុល ឬ ជែលទុកលាងដៃសំអាត និង ពាក់ម៉ាសឲ្យ​បានត្រឹមត្រូវ ដើម្បី ការពារនិងទប់ស្កាត់ជំងឺកូវីដ១៩ ​ទាំងអស់គ្នា​ផង​ដែរ​៕

អត្ថបទ៖ ​រស្មី​